Изолятордан қашу. Жауапсыздық танытқан 2 қызметкер жұмыстан шығарылды
Бұдан бөлек, 12 қызметкер жазаланды
Талғар УҰИ бастығы мен жауапты қызметкері қамаудан қашқан күдіктіге байланысты ішкі істер органдарынан жұмыстан шығарылды. Бұл туралы Ішкі істер министрлігі Tengrinews.kz тілшісінің ресми сауалына берген жауабында мәлімдеген.
"Талғар ауданы Полиция басқармасы қызметкерлерінің салғырттығына байланысты Өзіндік қауіпсіздік департаменті ҚР ҚК-ның 371-бабы ("Жауапты мемлекеттік лауазымды тұлғаның немесе құқық қорғау не арнайы мемлекеттік орган басшысының қызметтегі әрекетсіздігі") бойынша соталды тергеу амалдарын бастады. Аталған қылмыстық іс аясында лауазымды тұлғалардың әрекетіне құқықтық баға беріледі.
Сонымен қатар қызметтік тергеу нәтижелері бойынша 12 қызметкерге қатаң тәртіптік жауапкершілік шаралары қолданылды. Оның ішінде УҰИ бастығы мен жауапты қызметкері теріс себептермен ішкі істер органдарынан жұмыстан шығарылды", – деп хабарлады ҚР ІІМ
Бұдан бөлек, 21 қазанда қашу дерегі бойынша ҚР ҚК-ның 426-бабы ("Бас бостандығынан айыру орындарынан, қамаудан немесе күзеттен қашу") бойынша сотқа дейінгі тергеу басталды.
Еске сала кетейік, 26 жастағы ер адам өзінің туған жиенін зорлады деген күдікпен ұсталған болатын. Ол әжесімен бір үйде тұрған жиенін зорлады деген айып тағылған. 21 қазанда күдікті Талғар қаласының уақытша ұстау изоляторынан қашып кеткен.
Фото: Видеодан кадр
