Павлодарда ауызсу тарифін заңсыз көтерген кәсіпорын жауапқа тартылды

«Ақтоғай СУ» мемлекеттік коммуналдық кәсіпорны мемлекет бөлген субсидияларға қарамастан, сумен жабдықтау қызметтері үшін 1 текше метрге 201,75 теңге мөлшерінде артық тарифті негізсіз белгілеген. Бұл 17 кәсіпкерлік субъектісінің және 1381 жеке тұлғаның құқықтарына әсер етті.

Павлодар облысы Ақтоғай ауданындағы «Ақтоғай СУ» коммуналдық кәсіпорны мемлекет бөлген субсидияларға қарамастан, сумен жабдықтау қызметтері үшін 1 текше метрге 201,75 теңге мөлшерінде артық тарифті негізсіз белгілеген.

Сонымен қатар, кәсіпорын төлем мерзімін қысқартып, оны бұзғаны үшін өсімпұл мөлшерін 2,2 %-ға өсірген. Алайда, сумен жабдықтау қызметтерін көрсету жөніндегі үлгілік шартқа сәйкес өсімпұл мөлшері әрбір кешіктірілген күн үшін 0,1%-дан аспауы тиіс.

«Бұл мән-жайлар 17 кәсіпкерлік субъектісінің және 1381 жеке тұлғаның құқықтарына әсер етті.

Прокуратураның қадағалау актісімен кәсіпорын белгілеген тариф заңды тұлғалар үшін 190 теңгеге және жеке тұлғалар үшін 150 теңгеге дейін төмендетіліп, төлем мерзімдері сәйкестендірілді. Өсімпұл мөлшері 0,1%-ға дейін азайтылды. Кәсіпорынға 590 720 теңге көлемінде әкімшілік айыппұл салынып, кәсіпорын директоры тәртіптік жауапкершілікке тартылды», - деп хабарлады өңірлік прокуратурадан.

Фото: gov.kz