Қарағанды облысында 9 жасар бала ішімдік кесірінен терезеден секіріп кеткен

Қарағанды облысында 9 жасар балаға ішімдік ішкізіп, артынан бала терезеден секіріп кеткен, деп хабарлайды Malim.kz.

Облыстық кәмелетке толмағандардың істері жөніндегі ауданаралық сотының баспасөз қызметінің хабарлауынша, Қарағанды ​​облысының кәмелетке толмағандардың істері жөніндегі мамандандырылған ауданаралық сотында кәмелетке толмаған баланы мас күйіне жеткізген адамға қатысты «Әкімшілік құқық бұзушылық туралы» Кодекстің 131-бабында көзделген іс қаралған.

Іс материалдары бойынша, 2024 жылдың 5 қаңтарында сағат 23.00 шамасында азамат З., кәмелетке толмаған 2014 жылы туған П.-ның қамқоршысы бола тұра, қызының үйінде қонақта отырып алкогольдік ішімдік ішу кезінде жиені П.-ны алкогольдік масаң күйге келтірген. Алкогольді ішу салдарынан кәмелетке толмаған П., 4-қабаттағы пәтердің терезесінен құлап кеткен. Абырой болғанда, бала үйілген қардың үстіне түскен. Жедел жәрдем келген соң бала ауруханаға жатқызылған. Бүгінде ауруханадан шыққан.

Құқық бұзушы З. «Әкімшілік құқық бұзушылық туралы» Кодекстің 131-бабында көзделген әкімшілік құқық бұзушылықты жасағаны үшін кінәлі деп танылып, оған 3 тәулік мерзімге әкімшілік қамаққа алу түріндегі жаза қолданылды.

Фото: Қарағанды облыстық соты