Шымкентте бюджеттің 700 млн теңгесін жымқырған шенеунік сотталды
Ол құрылыс материалдарының құнын көтеріп көрсеткен
ҚМА Шымкент қаласы бойынша департаменті аса ірі көлемде бюджет қаражатын жымқыруға қатысты қылмыстық іс бойынша тергеу амалдарын аяқтады, деп хабарлайды Malim.kz.
Агенттік мәлімдеуінше, Шымкент қаласының әл-Фараби ауданы әкімі аппаратының басшысы өзінің қызметтік лауазымын пайдаланып, ЖШС директорымен және құрылтайшысымен алдын ала сөз байласу арқылы бюджет қаражатын жымқыру әрекетіне барған.
Күдіктілер қоқыс жәшіктері, шағын әңгіме-дүкен орындары, әткеншектер, ойын және жаттығу алаңдарын қоса, тұрғын үйлердің ауласын абаттандыру жұмыстарын жүргізу үшін, материалдардың құнын көтеріп сметалық құжаттар жасаған. Осы іс-әрекеттердің нәтижесінде 700 млн теңгеге жуық мемлекеттік мүлік талан-таражға түскен, деп жазылған Агенттік мәлімдемесінде.
Сонымен қатар, ЖШС директоры мен құрылтайшысы декларацияларға жалған мәліметтер енгізу арқылы салық төлеуден жалтарған.
Қабылданған шаралар нәтижесінде 194 млн теңгеден астам салық берешегі толық өтелген.
Сот үкімімен үш айыпталушы кінәлі деп танылып, 8 жылға бас бостандығынан айыруға сотталған. Үкім заңды күшіне әлі енбеді.
Фото: halyq-uni.kz
