Талғардағы кісі өлімі. Депутат істің созбаққа салынып жатқанын айтты

Мәжіліс депутаты Нартай Сәрсенғалиев Талғардағы қайғылы жағдайға байланысты Бас прокурор мен Ішкі істер министріне сауал жолдады, деп хабарлайды Malim.kz.

«Жұрттың жағасын ұстатқан жағдай Алматы облысы Талғар ауданында болды. Қоғамды қамықтыратыны сол, соңғы уақытта қоғамдық орында жас өспірімдердің бір-бірін аяусыз соққыға жығуы, қорлауы, ең сорақысы арты өлімге апаратын қайғылы жайттар жиілеп кетті. Телеарнаны қосып қалғанда, газет бетін ашып қалғанда, радионы басып қалғанда жастар бірі-бірін ұрды, соқты деген ақпараттан көз ашпайтын болдық. «Біздің қоғам қайда бара жатыр?», – деген сұрақтың көпшіліктің көкейінде көлкіп тұруы заңдылық осындайда. Кеше ғана Талғардағы дүкенде болған жағдай есімізді екеу, түсімізді төртеу қылды. Талғардағы тексіздердің тентектігінен 16 жасар бала, бір әулеттің аймаңдай азаматы Шерзат көз жұмды»,- деді депутат.

Сәрсенғалиев аудандағы құзырлы орын өкілдерінің істі созбаққа салып жатқанына наразылығын білдірді.

 «Әкесі мен бауыры соққыға жығылды. Ел өре түрегелді, артынша «істі ІІМ-і өз бақылауына алды» деген ақпарат тарады. Қоғамды қорқытатыны осы, қылмыскерді жазалау үшін, әділдікке жету үшін бейнеүндеу жасап әр істі бір министрдің бақылауға алғанын күтіп отыру керек пе? Неге жергілікті жердегі құқық қорғау орындары дереу істің ақ-қарасын анықтап әділ тергеу өткізбейді? Мұндай қылмыста құқық қорғау органдары бірден әрекет етуі керек»,-деп түйді мәжіліс депутаты.

Нартай Аралбайұлы білім беру ұйымдарындағы "Құқық негіздері" атты пәннің  сапасына қатысты сын көп екенін айтып,  аталған сабақтың бағдарламасын қайта жасауды, балаларды өмірде бетпе-бет келетін жайттар мен өмірден алынған нақты кейстерге сүйеніп оқыту керектігін атап өтті.

Фото: Мәжіліс