Алматыда 6 микроқаржы ұйымның заңсыз әрекеттері әшкереленді

Алматы қаласы бойынша Қаржы мониторингі агенттігі департаменті алты микроқаржы ұйымның заңсыз әрекеттерін әшкереледі, - деп хабарлайды Malim.kz тілшісі. 

"Creditum" МҚҰ, "Sofi Finance" МҚҰ, "Hava Finance" МҚҰ, "SF Offline" МҚҰ, "POS Credit" МҚҰ, "Сәлем Кредит" МҚҰ басшылығына қатысты алаяқтық және заңсыз кәсіпкерлік қызмет бойынша тергеу амалдары жүргізіліп жатыр.

"Төлемдері кешіктірілген қарыз алушыларды "KOKE.KZ", "TENGO.KZ", "HAVA.KZ" платформалары арқылы серіктес компаниялармен кепілдік шарттарын жасауға мәжбүрлеген", - делінген хабарламада. 

Бұл ретте кепіл берушінің жауапкершілігі тек қарыз алушы қайтыс болған жағдайда ғана күшіне енген. Бұл қызмет үшін бастапқы несие сомасынан бірнеше есе асып түсетін төлемдер алып, азаматтарды қарызға батырған.

Нәтижесінде қарыз алушылар несиенің бастапқы сомасынан 3-5 есе көп төлем жасауға мәжбүр болған.

"Мысалы, қарыз алушы Ш. 120 мың теңге несие алып, негізгі қарыз бен пайыздарды қоспағанда тек кепілдік үшін 446 мың теңге төлеген. Осылайша, микроқаржы ұйымдарының негізгі табысы жалған кепілдік шарттары бойынша төлемдерден жасалған", - делінген хабарламада. 

Бұл заңсыз әрекеттерден жалпы сомасы 30 млрд теңге көлемінде шығын келген.
Тергеу жалғасып жатыр. 

Фото: Қаржы мониторингі агенттігі ұсынған видеодан скрин