Болат Назарбаевтың «Адам жегіші» 15 жылға сотталды

Астананың қылмыстық істер жөніндегі мамандандырылған ауданаралық соты Елдос Қоспаев пен оның ұйымдасқан қылмыстық тобының мүшелеріне үкім шығарды, деп хабарлайды Malim.kz. 

Марқұм Болат Назарбаевтың жақын серігі, «адам жегіш» лақап атымен танымал Елдос Қоспаев 15 жылға бас бостандығынан айырылды. 

Ол жазасын қауіпсіздігі орташа колонияда өтейді.

Ағайынды Елдос, Айдос, Айбек Қоспаевтар ұйымдасқан қылмыстық топ құрып, «AV-Construction» ЖШС, «Стекольный завод» ЖШС, «Шалқар 17» ЖШС, «Бахар-А» ЖШС сияқты ірі бизнестерді тартып алған деген күдікке ілінген болатын. Сот осы іске қатысты тергеуді аяқтап, Алматыдағы Айдос Қоспаевқа тиесілі «Никольский» базарының аумағында орналасқан жер учаскесі мен мүлкіне тыйым салған еді.

Кейін Қаржы мониторинг агенттігі бірнеше үлкен бизнесті тартып алған ағайынды Қоспаевтарға қатысты тағы бір қылмысты анықтағаны айтылған.

Қазақстанда компанияларды рейдерлік жолмен тартып алумен айналысқан Қоспаев басқаратын ұйымдасқан қылмыстық топтың құрамында 11 адам болған. Қылмыстық топтың мүшелері алғаш рет өткен жылдың шілде айында ұсталғаны белгілі болды. Олар Алматы, Алматы облысы және тағы үш аймақта әрекет еткен. Рейдерлер көлеңкелі бизнесті белсенді жүргізіп, одан түскен табыстарды заңдастыру мақсатында қымбат жылжымайтын мүлік пен автокөліктер сатып алған.

Фото: ҚМА