Ферроқорытпа зауытындағы апат: құтқарушыларға хабар екі сағаттан кейін түскен
Оқиға таңғы сағат 4:10 кезінде болған.
Төтенше жағдайлар вице-министрі Бауыржан Сыздықов ферроқорытпа зауытындағы апат туралы хабар құтқарушыларға екі сағаттан кейін ғана түскенін айтты, деп хабарлайды Malim.kz.
Бұл жерде негізі оқиға таңғы сағат 4:10 кезінде болған. Бірақ, өкінішке қарай, ол хабар бізге 18:08 минут кеткенде түскен. Былайша айтқанда, екі сағаттан кейін түсіп отыр. Ол біздің азаматтық қорғау саласындағы заңнамаға қайшы келеді. Біздің күш-құралдар ол жерге санаулы минуттарда жетті. Өкінішке қарай, сол мекеменің қызметкерлері біздің құтқарушыларды ол жерге кіргізбеуге тырысқан. Сондықтан оларға қазір әкімшілік шара қолданылып, әкімшілік іс қозғалды, – деді Бауыржан Сыздықов.
Сондай-ақ Қазақстан аумағында орналасқан мекемелердің бәрі төтенше жағдай болған кезде өзінің аумағына құтқару күш-құралдарын кіргізуге міндетті екенін атап өтті.
Еске салсақ, бұған дейін Қарағандыдағы ферроқорытпа зауытында апат болып, бірнеше жұмысшы жарақат алғанын жазған болатынбыз.
Фото: gov.kz
