«Мақтауға әбден лайық». Айжан Аймағанова Бишімбаев қылмысын ашқан маңызды адамды атады

Қуандық Бишімбаев ісінде мемлекеттік айыптаушы болған прокурор Айжан Аймағанова соттан кейінгі әсерімен бөлісті, деп хабарлайды Malim.kz.

Прокурор Айжан Аймағанова көпшіліктің ықыласына бөленіп, халықтың алғысын алып жатыр. Дегенмен, оның айтуынша, алғыс алуы тиіс тағы бір адам бар. Аталған қылмыстық істі ашуда тергеуші Әлима Жамалиеваның еңбегі орасан екені белгілі болды.

Тергеу қалай өткенін айта алмаймын, өйткені мен бұл іс бойынша процессуалдық прокурор болған жоқпын. Бірақ бұл жерде өз ісінің кәсіби маманы, тергеуші Әлима Жамалиеваның атқарған рөлі зор екенін айта кеткен жөн. Ол өте жоғары деңгейде тергеу жүргізді. Оған өзінің лайықты бағасын беру керек. Ол мемлекеттік айыптаушылардан да көп құрмет пен мақтауға лайық, - дейді Айжан Аймағанова.

Сондай-ақ прокурор сот отырысын ұйымдастыру ісіне тоқталды.

Сот жоғары деңгейде ұйымдастырылды. Қазақстан тарихында тікелей эфирде бірінші рет көрсетіліп жатқанын ескерсек... Ескеретін тұстар аз емес еді... Барлық сәттер, қайда, қалай сөйлер едік. Барлық дүниеге мұқият қарау керек болды. Сот отырысының өзі кәсіби жоғары деңгейде өтті, - дейді Айжан Аймағанова tengrinews.kz-ке берген сұхбатында.

Мемлекеттік айыптаушы алқабилердің үкіміне ешқандай қарсылық танытпады.

Ол айыпталушының осы жазаға әбден лайық екенін атап өтті.

Фото: Tengrinews.kz/Тұрар Қазанғапов