Қонаевта Жаңа жыл безендіруіне байланысты аудит жүргізіледі
Безендіруге 148 млн 528 мың теңге жұмсалған
Қонаев қаласының эстетикалық безендірілуіне қатысты ақпараттың анық-қанығы тексерілетін болды. Әлеуметтік желі бұл қызметке 148 млн 528 мың теңге жұмсалғаны және қойылған нысандардың техникалық құжаттамаға сәйкес емес екені туралы жазылған, деп хабарлайды Malim.kz.
Осыған байланысты Қонаев қаласының әкімдігі мердігер компанияның тәуелсіз аудиттерге жүгінгенін мәлімдеді. Аудиттің нәтижесіне бойынша кемшіліктер анықталса, әкімдік тарапынан мердігерге қатысты тиісті шаралар қабылданады.
Қалалық ТҮКШ және ТҮИ бөлімінің мемлекеттік тапсырысын орындауға портал арқылы «Жасыл қала Қонаев» ШЖҚ МКК таңдалған. Аталған мекеме орталық алаңға шырша, Д.Қонаев ескерткіші маңына 2025 мерекелік жазуын, түрлі ойыншықтар орналастырып, №5 жағажай аумағын безендіріп, саябақ, көпір, қалаға кіреберістегі стела мен аллеяларды жарықтандырған, мерекелік ойыншықтар қойған. Мемлекеттік тапсырысты беру кезінде тек Жаңа жылда ғана емес, жыл соңына дейін нысандардың жарықтандырылып, көрікті болуы есепке алынған.
Ал №5 жағажай туристік тартымдылықты арттыру мақсатында безендірілді. Шағын сәулеттік нысандар «Жасыл қала Қонаев» ШЖҚ МКК балансында қалып, келер жылы да пайдаға асады. Жыл соңында қаланы безендіруге мемлекеттік тапсырыс тек қосымша әрлеу ретінде жасалады, деп жазды қала әкімдігі.
Фото: instagram/qonaev_akimdigi
