Үкіметте IT-компанияларды қолдауға арналған жұмыс тобы құрылды
Бүгін Үкіметте өткен Дағдарысқа қарсы шаралар жөніндегі жедел штабтың кезекті отырысында IT-саласын қолдау және дамыту мәселесі талқыланды.
Цифрлық даму, инновациялар және аэроғарыш өнеркәсібі министрі Бағдат Мусин ведомство дайындаған бірқатар ұсыныстарды таныстырды. Атап айтқанда, IT-мамандарына әскери қызметті кейінге қалдыру, отандық IT-шешімдерді енгізу үшін жеңілдікті кредит беру, «Astana Hub»-та эксаумақтылық қағидаты бойынша салық преференцияларының қолданылуын 2029 жылға дейін ұзарту.
Сонымен қатар, Қазақстанда жұмыс істеуге мүдделі шетелдік IT-мамандардың ұсыныстарын жедел қарау үшін арнайы жұмыс тобы құрылды. Оның құрамына «Astana Hub» халықаралық IT-стартаптар технопаркінің, «Азаматтарға арналған үкімет» КЕАҚ, Нұр-Сұлтан және Алматы қалалары әкімдіктерінің өкілдері кірді. Жұмыс тобы мамандардың елге кіру, тұру және компания ашуына көмек береді. Сондай-ақ IT-саласын мемлекеттік қолдау шаралары туралы толық нұсқаулықтары бар веб-сайт пен әлеуметтік желілерде топтар құрылады.
Айта кетейік, Ресейдің Украинамен соғысы басталғаннан кейін ресейлік бірқатар компаниялар Қазақстанға көшуге ынта білдірген. Олардың қатарында Ресейдегі кеңсесін Алматыға көшірген inDriver компаниясы бар.
