Мемлекет басшысы Қасым-Жомарт Тоқаев Алексей Цойды денсаулық сақтау министрі қызметінен босатты. Бұл туралы Ақорданың баспасөз қызметі хабарлады.
Мемлекет басшысының Жарлығымен Алексей Владимирович Цой Қазақстан Республикасының Денсаулық сақтау министрі қызметінен босатылды, - делінген хабарламада.
Экс-министр әлеуметтік желідегі парақшасында алдағы уақытта азаматтық секторға ауысып, денсаулық сақтау жүйесін ғылым арқылы дамытуға үлес қоспақ ниетте екенін жеткізді.
“Бүгін менің азаматтық секторға өту және денсаулық сақтау саласын әлеуметтік басталамалар мен ғылым арқылы дамыту жайлы бастамам қолдау тапты. Мемлекет басшысы тарапынан елдегі COVID-19 ахуалын реттеу, денсаулық сақтау жүйесінің әлеуетін арттыру туралы тапсырма берілді. Біздің тарапымыздан эпидемиологиялық қауіп-қатерді реттеуге жағдай жасалды. Барлық аймақтарда жаңа инфекциалық ауруханалар ашылып, жедел жәрдем қызметінің автопарктері жетілдірілді, жасанды тыныс алу аппараттары алынып, ауылды жерлерде жылжымалы медициналық кешендер ашылды және басқа да көптеген ауқымды істер атқарылды", - делінген жазбада. Экс-министр ел билігіне, Президент әкімшілігі мен Үкімет басшысына және бұрынғы әріптестеріне, блогерлер мен БАҚ өкілдеріне және медициналық қызметкерлерге алғыс білдіретінін жеткізді.
Айта кетейік, Алексей Цой бұл қызметке 2020 жылдың 25 маусымында тағайындалған болатын.
Оқи отырыңыз: Біртанов бастамасы. Дәріханалар заңнан неге қорықпайды?
