Фото: elorda.info
Өздерін жасылдар деп атайтын «Байтақ» партиясы сайлауалды съезін өткізді. Былтыр ғана құрылған партия биылғы ҚР Парламенті мәжілісі сайлауына 23 адам ұсынбақ.
Осы 23 адамдық тізім ұсынылғанда партияластар арасында аздаған дау да туып қалды. Оның себебі – бұрын партиялық тізім бойынша мәжіліске баруы мүмкін делінген атыраулық партия мүшесі Марал Көшенов өзін тізімнен таппай, наразылық білдірген. Оның орнына басқа бір адам кіріп кеткен.
Партия төрағасы Азаматхан Әміртай бұл мәселеге қатысты партияның өңірлік филиалдарын айыптайды. Оның айтуынша, олар дер кезінде тізім өткізбей, құжаттарын кешіктірген. Әрине, «Байтақтың» қанша пайыз дауыс алатыны әлі белгісіз.
Айта кету керек, Парламент мәжілісі депутаттарын сайлау 19 наурыз күні өтеді. Оған өзін өзі ұсыну бойынша және партиялық тізім бойынша үміткерлер қатысады.
