Қорғаныс министрі Нұрлан Ермекбаев Жамбыл облысы Байзақ ауданында болған әскери бөлімдегі жарылыстан кейін отставкаға кетуді сұрайтынын мәлімдеді. Бұл туралы министр "Азаттық" радиосы тілшісінің отставкаға кету туралы сұрағына жауап бергенде айтты.
"Қазір басты мақсатым, апат салдарын жою. Отставка мәселесі қызықтыратын болса, осы хабарды естігеннен кейін бірінші минутта отставкаға беру, отставка сұрау туралы шешім қабылдадым. Отставканы сұраймын, ал қалай болатынын жоғары басшылық шешеді", - деді Нұрлан Ермекбаев "Азаттық" тілшісіне.
26 тамыз күні Жамбыл облысы Байзақ ауданындағы әскери бөлімдегі жарылыс болып, өрт шықты. Өртті сөндіру кезінде төрт әскери қызметкер қаза тапты. Ондаған адам жараланды. 60-тай адам жеңіл жарақат алды, Байзақ ауданының ауруханасында оларға көмек көрсетілген соң, үйлеріне жіберілді. 28 адам Тараз қаласындағы ауруханада жатыр, алтауының жағдайы орташа ауыр.
Қазақстанда екі жылда осымен екінші әскери қоймада жарылыс болды. 2019 жылдың маусымында Арыс қаласындағы қоймада өрт шығып, жарылыстарға ұласты. Оқиғадан төрт адам қаза тапты, олардың бірі бала. 40 мыңнан астам тұрғын Арыстан Шымкентке эвакуацияланды.
Фото: ortcom.kz
Байланысты жаналықтар
MalimBlocks
