Мамин Тоқаевқа уәде берді
Үкімет басшысы Асқар Мамин президент жолдауының барлық бағыттарын іске асыру бойынша жалпыұлттық жоспар жасалып, 7 қыркүйекке Тоқаевтың алдына бекіту үшін кіргіземіз деп уәде берді. «Президент мемлекеттік басқаруды жетілдіру, кадр саясатын, шешім қабылдау және олардың орындалуы үшін жауапкершілік жүйесін қайта қарау бойынша бірқатар тапсырмалар берді. Оның ішінде Мемлекет басшысына бағынышты мемлекеттік органдар құрылады. Осы міндеттерді орындау үшін Үкімет жедел және нақты шаралар қабылдауы қажет. Мемлекет басшысының жолдауын толық және уақытында іске асыру үшін қажетті ресурстар мен құралдар бар. Осы ретте жолдауды белгіленген міндеттерді тиімді орындау бойынша үйлесімді жұмысты қамтамасыз етуіміз қажет. Мемлекеттік органдарға жалпыұлттық жоспар бойынша ұсыныстарын 4 қыркүйекке дейін Ұлттық экономика министрлігіне енгізуді тапсырамын. Келесі отырыста Мемлекет басшысының бекітуіне енгізу үшін жалпыұлттық жоспардың жобасын қарастырып, мақұлдауымыз керек», - деді Асқар Мамин.
Естеріңізге сала кетейік, 1 қыркүйек күні Тоқаев халыққа кезекті жолдауын жасаған еді.
Самое читаемое
