Қырғызстанда дүйсенбі күні болған наразылық шеруінде жарақат алып, зардап шеккендердің саны 22-ге жетті деп хабарлады Қырғыз денсаулық сақтау министрлігі.
Ведомство баспасөз қызметінің мәліметінше, 22 адамның 19-ы күштік құрылым өкілдері.
«Бішкек қалалық денсаулық сақтау ұйымдарында 22 адам (3 қарапайым тұрғын, 19 кұштік құрылым қызметкерлері) медициналық көмекке жүгінген, - делінген хабарламада. Бұдан сәл ертерек жарақат алғандар саны 19, оның 18-і полиция қызметкерлері екені айтылған.
Соңғы мәліметке сәйкес, митинг кезінде жарақат алғандардың 21-і үйлеріне қайтарылған. Ал, бір полиция қызметкері Ұлттық госпитальға жатқызылған. Оған миы шайқалған, мойын омыртқасына зақым келген деген диагноз қойылған.
Еске салсақ, кеше Бішкек түрмесінде отырған саясаткер Садыр ЖАПАРОВТЫҢ жақтаушылары митингіге шығып, тұтқындағы экс-депутатты босатуды талап еткен. Ала-Тоо алаңында болған митингке қатысты Қырғыз президенті баспасөз қызметі биліктің наразы топ қойған талаптарды қарастыратынын хабарлағанмен, жиналғандар тарай қоймады. Осыдан кейін ішкі әскер митингіге шыққандарды алаңнан күштеп қуып, су атқыш, көзден жас ағызатын газ қолданған. Дегенмен, соңыра дәрігерлерге шағымданған бір қыздың резиналы тапанша оғынан жарақат алғаны анықталды. Ал, Жапаровтың жақтастары полицияға тас лақтырып, қоқыс жәшіктерін өртеп қарсылық көрсеткен.
Мәліметтерге сәйкес, Ала-Тоо алаңына 800-ге жуық наразы келген.
Фото: sputnik.kg
Байланысты жаналықтар
MalimBlocks
