Тоқаев ХОК-тің жаңа президенті Кирсти Ковентриге құттықтау хат жолдады
Қасым-Жомарт Тоқаев Кирсти Ковентриге Халықаралық Олимпиада комитетінің президенті болып сайлануына орай құттықтау жеделхатын жолдады
Мемлекет басшысы Қасым-Жомарт Тоқаев Кирсти Ковентриге Халықаралық Олимпиада комитетінің президенті болып сайлануына орай құттықтау жеделхатын жолдады, - деп хабарлайды Мalim.kz тілшісі.
"Қазақстан Президенті Зимбабве өкілінің спорттағы айтулы жетістіктерін және мемлекеттік қызметтегі бай тәжірибесін атап өтіп, оның халықаралық олимпиада қозғалысын дамытудағы қызметіне сәттілік тіледі", - делінген хабарламада.
Кирсти Ковентри туралы не белгілі?
Кирсти Ковентри 1983 жылғы 16 қыркүйекте Зимбабве астанасы Харареде дүниеге келген.
Ол - танымал жүзгіш, Олимпиаданың екі дүркін чемпионы, жақында Халықаралық Олимпиада комитетінің (ХОК) жаңа президенті болып сайланды. Ол 2025 жылғы 24 маусымда қызметіне кіріседі және бұл лауазымды иеленген алғашқы әйел атанады.
Қазір Ковентри Зимбабве Республикасының спорт, демалыс, өнер және мәдениет министрі қызметін атқарады. Спортшы ретінде ол Африканың ең үздік жүзгіштерінің бірі саналады және Олимпиада ойындарында Зимбабве үшін ең көп медаль жеңіп алған спортшы.
Фото: IOC/Greg Martin
