Дональд Трамп өзінің әкімшілігі Украина мен Ресеймен кеңес өткізуді жоспарлап отырғанын және ол бойынша талқылау «жақсы» жүріп жатқанын мәлімдеді, деп хабарлады ВВС-ге сілтеме жасап www.malim.kz.
«Біз әртүрлі тараптармен, соның ішінде Украина және Ресеймен кездесулер мен келіссөздер жүргізуді жоспарлап отырмыз. Менің ойымша, бұл талқылаулар шын мәнінде жақсы жүріп жатыр», – деп мәлімдеді Трамп журналистерге, бірақ ешқандай нақты мәлімет берген жоқ.
Бұдан бұрын Дональд Трамп Ресей президенті Владимир Путинмен келіссөз жүргізуге дайын екенін айтқан еді, алайда Кремль Вашингтоннан нақты ұсыныстар әлі түспегенін айтқан болатын.
Украина президенті Владимир Зеленский Associated Press басылымына берген сұхбатында Украина қатыспайтын кез келген келіссөздің қауіпті екенін айтқан.
«Менің ойымша, бұл өте қауіпті. Егер Украинасыз Америка мен Ресей арасындағы тікелей келіссөздер болса, бұл өте қауіпті. Олар өзара қарым-қатынас орнатуы мүмкін. Бірақ Украинасыз бұл мәселе туралы айту – бәріне қауіпті», – деген еді Зеленский.
Фото: Reuters
