Волонтерлер Тоқаевты президентікке ұсынып жатыр
Олар Тоқаевты волонтерліктің дамуына елеулі үлес қосқан президент деп есептейді.
5 қазанда Астана қаласында өткен Ұлттық волонтерлік желісінің волонтерлік ұйымдарының жиналысында волонтерлер қазіргі уақыттағы Мемлекет басшысы Қ.Тоқаевты қолдау және оны жаңа мерзімге Президентке үміткер ретінде ұсыну бастамасын көтерді.
Ұлттық волонтерлік желісінің төрағасы Вера Ким волонтерлік ұйымдарға өзінің үндеуінде:
«Осы жылдар ішінде Мемлекет басшысы еріктілік саласындағы барлық маңызды бастамаларды қолдай отырып, бірнеше рет волонтерлер мен волонтерлік ұйымдардың еңбегін жоғары бағалады және шын жүректен алғысын айтты. Президент волонтерлерге «ізгі ниеті мен таза ар-ожданы бар асыл адамдар» ретінде сенім артады. Бұл шабыттандырмауы мүмкін емес.
Қазақстан Президентіне деген сенім мандатымыз еліміздің көркеюі мен халқымыздың мүддесі үшін бағытталған мемлекеттік бағдарламалар мен ауқымды реформаларды жүзеге асыруға мүмкіндік беретініне сенімдіміз.
Біздің Президентіміз волонтерлік қозғалысты қолдайды, ендеше бізде өз Президентімізді қолдайық!» - деді.
Волонтерлік желісінің мүшелері волонтерліктің дамуына президент Қасым-Жомарт Тоқаев елеулі үлес қосты деп есептейді.
«Оның тікелей қолдауы нәтижесінде халықаралық және республикалық деңгейлерде волонтерлік қызметті дамыту бастамалары және бірқатар стратегиялық маңызды құжаттар қабылданды. Президент 2020 жылды Волонтер жылы деп жариялау бастамасын қолдады. Бұл шешім өте маңызды рөл атқарды. Себебі COVID-19 пандемиясымен күресте медицина және өзге де қызметтермен бірдей алдыңғы қатарда волонтерлер де болды. Бұл волонтерлік жобалар үшін гранттарды дамытуға, пандемия кезінде көрсеткен азаматтық белсенділігі үшін «Халық Алғысы» мемлекеттік медалін тағайындау және 5 мыңнан астам қазақстандықтарға табыстауға ықпалын тигізді», - делінген ұлттық волонтерлік желісі таратқан мәлімдемеде.
Айта кету керек, қазір Қазақстанда 600-ге жуық волонтерлік ұйым бар. Ал, президент Қасым-Жомарт Тоқаев кезектен тыс сайлауды 20 қарашаға белгілеген және өзі де сайлауға түсуге дайын екенін айтқан. Әзірге, ол өз кандидатурасын ұсынған жоқ.
Байланысты жаналықтар
MalimBlocks
