Ресей Украинаға кезекті ауқымды дрондық шабуыл жасап, Одессадағы порт инфрақұрылымына соққы берді, деп хабарлайды Malim.kz. DW-ге сілтеме жасап.
Салдарынан қоймалар, резервуарлар және азаматтық кеме зақымданды. Украина әуе қорғанысы 144 ұшқышсыз аппараттың 124-ін атып түсіргенін хабарлады.
Украина Қарулы күштерінің Әуе күштері 26 сәуірге қараған түні жасалған жаппай шабуылды тойтарғанын мәлімдеді. Әскери мәліметке сәйкес, Ресей ұшырған 144 дронның 124-і жойылған немесе радиоэлектрондық құралдар арқылы залалсыздандырылған.
Шабуылдың негізгі нысандарының бірі Одесса қаласы болды. Украина премьер-министрінің орынбасары Алексей Кулебаның айтуынша, соққы салдарынан қаланың порттық және логистикалық инфрақұрылымына елеулі зиян келтірілген.
Атап айтқанда, қойма ғимараттары, техникалық жабдықтар, жүк сақтайтын резервуарлар мен әкімшілік нысандар зақымданған. Сондай-ақ жүк тасымалдайтын көліктер мен Палау туы астында жүзетін азаматтық кеме де бүлінген.
