«Өліп кетсем де бала туып беремін». Майра Мұхамедқызы күйеуі екеуінің басынан өткен сынақ туралы айтты

Қазақстанның халық әртісі, мемлекеттік сыйлықтың лауреаты Майра Мұхамедқызы Дана Нұржігітке берген сұхбатында өмірлік жолдасының қалай қолдайтынын айтты, деп хабарлайды Malim.kz.

Дана Нұржігіт өнер иесінің жары Ақсан қай кезде де көлеңкеде қалса да, оның ерекше тұлға екенін алға тартты. Әнші де мұнымен келісіп, күйеуін өнерінің қорғаны екенін айтты.

Парасатты, жүрегі тап-таза адам. Мен оған риза болатыным - екеуміздің арамызда 20 жыл бала болмады. Сол кезде мен оған «өліп кетсем де бала туып беремін. Әйел ретінде саған қарызбын» дедім. «Егер бала туа алмасам, басқаға кетуіңе болады. Махаббатымды қиямын» дедім. Ол баланы Алла беретінін айтып, мәңгі менімен бірге болуға уәде берді. Мен өз сөзімде тұрып, қыз тудым, - дейді Майра Мұхамедқызы.

Әнші күйеуінің кез келген дүниені ерекше махаббатпен жасайтынын тілге тиек етті.

«Қызым, мен сені армандарыңа жеткізсем, мен бақыттыммын» дейді. Ешқашан шаршадым деп айтпайды. Барлығын махаббатпен істейді. Өнер жолыма қорған ретінде осы жігітті берген шығар деп ойлаймын. 18 жастан бері, яғни 40 жыл біргеміз, - деді әнші.

Фото: "Астана Опера"