«Опық жедім». Қайрат Нұртастың жары ел алдында жақынымен соттаспақ

Танымал актриса Жұлдыз Әбдукәрімованы жақын адамы алдап, құжаттарға қол қойғызып алған, деп хабарлайды Malim.kz.

Әнші Қайрат Нұртастың жары көпшілікпен сырласып, ел алдында өзін алдаған алаяқты сотқа беретінін мәлімдеді.

"Айтсам ба, жоқ па деп көп ойландым. Ешкімнің абыройын түсіргім келмеп еді. Алайда бұққан сайын, сұғып барады. Осыдан 3-4 жыл бұрын жақын адамымнан опық жедім. Оңдырмай алдап кетті. Барымды тартып алды. «Жаным, күнім» деген адамнан сатқындық көремін деп кім ойлаған? Қазір есіме түсіріп, өзіме таңқаламын. Қалайша жол бердім? Осынша уақыт қалай үндемей шыдап келдім. Ол уақыт мен үшін сынаққа толы күндер еді. Жаным қиналып, айналамнан ақыл сұрайтын адам таппай басымды тауға да, тасқа да соғып жүргенде алдымнан «күндей» жарық бір кісі шықты. Бәлкім, менің құтқарушым осы болар деп ойладым", - дейді Жұлдыз Әбдукәрімова.

Актриса ол адамның іш-бауырына кіріп, сырын тыңдап, үйінен талай ас ішкенін де жасырмады.

"Қит етсе қалымды сұрап, менің жағдайымды өзінікіндей көріп, уайымдап жүрді. Менің ештеңеден хабарым болмай, жаратқанға алғыс айтумен болдым. Жарты жыл қасымда жүріп, мендегі қымбат дүниені санап жүрген екен. Мен өз қайғымнан есімді жия алмай жүргенде, ол біраз құжатқа қолымды қойдырып алды. Ертең сол кісімен кездесуге барамын. Мәселе шешілмесе, сотта кездесеміз. Егер оқырманым талап етсе, соттың елдің алдында онлайн өткенін талап етемін. Сотта барлығы айтылады. Оның әділ өтеріне сенемін", - деп жазды актриса.