Танымал тележүргізуші Ләйлә Сұлтанқызы FlyArystan ұшағында жарақат алды
Ол әуекомпанияның үстінен арыз жазды.
Танымал тележүргізуші, журналист Ләйлә Сұлтанқызы FlyArystan ұшағында денсаулығына зақым келгенін мәлім етті, деп хабарлайды Malim.kz.
"Бүгін кешкі 21:50 кезінде KC7326 рейсімен Шымкенттен Астанаға ұшып келдім. Ұшақтың есігі ашылмай, тұрып кеткен жанымдағы жолаушының абайсыздығынан бетіме үстіңгі сөреде тұрған ауыр зат маған құлап, көзімнің тұсын жырып, қабағым жарылды. Flyarystan әуекомпаниясы қауіпсіздік шарасын сақтамағандықтан осы жағдай орын алды. Бортсеріктер мен әуекомпанияның алғашқы көмекке дайын емес болғанына қапа болдым! Не аптечка, не мұз, не суық зат, не қан тоқтатын, не салфетка жоқ", - деп шағымданды Ләйлә Сұлтанқызы.
Журналист рейсте алғашқы көмек қарастырылмағанын алға тартты.
"Менің орнымда бала, қарт адам отырып, басы жарылса, қатты жараланса, миы шайқалса, көп қан кетсе жағдай қиын болар еді. Әр бортсерік жолаушы мініп-түскенше адам денсаулығына жауапты, алғашқы көмек көрсетуге міндетті!" - деп жазды ол әлеуметтік желідегі парақшасында.
