«Хиджаб кимегеннен өлтіреді». Әнші Ұланғасыр Қамиевтің үстінен іс қозғалды

Жақында әнші Ұланғасыр Қамиевтің хиджабқа қатысты мәлімдемесі әлеуметтік желіде қызу талқыға түсті. Осыған байланысты Facebook желісінің қолданушысы Саида Қастанеда өнер иесінің үстінен ІІМ-ге арыз түсіргені белгілі болды, деп хабарлайды Malim.kz.

Қоғам белсендісі арызды гендерлік алауыздықты қоздыру, әйелдерге деген өшпенділікті қоздыру бабы бойынша түсірген.

"Біздің "дәстүрлі" депутаттар жанжалды азамат Ұланғасыр Камидің үстінен қандай да бір себептермен арыз түсірмегендіктен, олардың орнына мен істедім!
Бүгін е-өтініш арқылы ІІМ-ге ҚР ҚК-нің 174-бабына сәйкес әлеуметтік және гендерлік алауыздықты қоздыру, әйелдерге деген өшпенділікті қоздыру және әйелдерді/қыздарды өз күйеулері, бұрынғы күйеулері, жігіттері және туыстарының өлтіруі мен ұрып-соғуын ақтау туралы мәлімдемелерін тексеру туралы арыз жаздым.
Арыз тіркелді, қандай да бір іс қозғала ма әлде әдеттегідей бола ма, көреміз", - деп жазған ол.

Ішкі істер министрлігі арыздың тіркелгенін мәлімдеді.

"Арыз тіркелді. Тексеру жүргізіледі, оның нәтижелері бойынша процестік шешім қабылданады", - делінген ІІМ жауабында.

Әнші тікелей эфирде оқырмандарының сұрағына жауап бергенде әйеліне хиджаб кигізетінін айтқан.

"Күйеуі әйелін өлтіріп қойды, анау-мынау дегеннің бәрі хиджаб кимегеннен басталған. Ұстаздар баяғыдан айтып келе жатыр. Ондай оқиғалар көп негізі. Әйелі санын жалтыратып көшеге шығады. Одан кейін біреу оған қызығады. Оны күйеуі не істейді? Барып өлтіріп қояды деген секілді", - дейді әнші видеода. 

Өнер иесі болашақ әйелі хиджаб кисе ғана үйленетінін атап өтті.

"Басын кесіп алса да шешпейді. Шын түсініп киген әйел оны шешпейді. Басқасында шаруам жоқ. Ертең, бұйырса, өз әйеліме кигіземін, басқасында шаруам жоқ. Бұған көнетін әйелді аламын, көнбесе алмаймын. Кимесе "чао" деймін. Себебі санын жалтыратып, ешқайда шығарғым келмейді", - дейді Ұланғасыр Қамиев. 

Фото: Видеодан кадр