Алматы қаласының бас санитар дәрігері Жандарбек Бекшин Алматыда жастар мен балалар арасында вирусты жұқтыру көрсеткіші күрт артқанын мәлімдеді. Бекшиннің айтуынша, вирустың өзгертілген мутациясын қазақстандықтар сырттан алып келуі мүмкін, қазір сол штамның түрін анықтау бойынша зерттеу жүріп жатыр.
"Жапон", "дат" және "калифорниялық" тәрізді штамдар шығып жатыр. Біз ең алдымен "дат" және "оңтүстікфарикалық" штамдарды анықтау бойынша жұмыс жүргізіп жатырмыз. Зерттеу нәтижесінде Алматыда мутацияға ұшыраған штамм анықталды. Оның қандай штамм екенін зерттеу көрсетеді", - деді Бекшин.
Жандарбек Бекшин жаңа штамды сыртқа шығып жүрген қазақстандықтар елге әкелді деген болжам айтты.
"Азаматтарымыз АҚШ, Еуропа, Ресейге шығып жүргенін ескерсек, ең алдымен сол елдерде пайда болған штамдарды анықтау бойынша жұмыс жүргізіп жатырмыз", - деді Бекшин.
Жандарбек Бекшин жаңа штамдар несімен қауіпті екеніне де тоқталды. Айтуынша, мутацияға ұшыраған вирус жастарға жұқпалы келеді.
"Жаңа штамдар былтыр болған вируспен салыстырғанда 70 пайызға жұқпалы. Оны жұқтыратындар жасарды. Былтыр 80-жылы туғандар ауырса, биыл 90-жылдары туған жастар жұқтырып жатыр. Мектепке дейінгі жастағы балаларға жұғу көрсеткіші екі есе, ал мектептегі балаларға жұғу көрсеткіші үш есе артты. Қатты жұқпалы болғандықтан, оның таралуын тежеу бойынша шаралар қабыдап жатырмыз", - деді Бекшин.
