Алматыдағы шаңғы трамплині төңірегіндегі дау басылмай тұр. Кешенді салған мердігер «Дан-Строй» АҚ, «Тол-Құрылыс» ЖШС және «Соната-В» компанияларының өкілдері Алматы қаласының әкімдігі бірнеше жылдан бері тиісті ақшаларын бермей келе жатқанын айтады.
«Дан-Строй» АҚ және «Тол-Құрылыс» ЖШС өкілі Жандос Иманқұловтың сөзінше, компания 2015 жылдан бері әкімдіктен істелген жұмыстарының ақшасын ала алмай келеді.
«2014-2015 жылдары біз К-60, К-40 және К-20 үш трамплинін салдық. Ол трамплиндердің барлығының ақшасы төленді. Үшінші кезеңдегі спортзал және т.б ақша болмай, біз сала алмаймыз дедік. Содан қалалық әкімшілікке консервацияға жабайық немесе күзеттің ақшасын төлеңіздер деп өтініш хат жаздық. Бірақ олар консервацияға да жапқан жоқ, күзеттің де ақшасын төлеген жоқ. Кейіннен «өзіміз инвестор табамыз, сосын істеген ақшаларыңды толығымен қайтарып береміз» деді. Инвесторға сатты. Олар бір екі-үш ай 40 миллиондай төледі. Қалғаны «жабулы қазақ жабулы күйінде қалды». Содан бері біз ақшамызды ала алмай жүрміз», - дейді Иманқұлов.
Жандос Иманқұловтың айтуынша, қалалық әкімдік компанияға 3 миллиард 265 миллион теңге қарыз.
«Әкімшіліктің компанияға жалпы қарызы 3 миллиард 265 миллион теңге. 2015-2016 жылдан бері қарызды жөнінде жіберілген хаттар да бар», - дейді ол.
«Дан-Строй» АҚ және «Тол-Құрылыс» ЖШС өкілі Әбдіразақ Байболатовтың сөзінше, қаржы министрлігі 2016 жылы әкімдіктің қарызы бар екенін құжат жүзінде мойындаған. Бірақ қазір әкімдік трамплинге байланысты ешқандай қарыз жоқ дейді.
«Қазір әкімшілік ешқандай қарызымыз жоқ деп отыр. Бірақ шын мәнінде әкімдіктің 3 миллиард 265 миллион 300 мың теңге қарыз екені жөнінде құжаттар бар... 2016 жылы Қаржы министрлігі біздің сұрауымызға (әкімдіктің – ред) қарыздары бар екенін мойындап жауап берген», - дейді Байболатов.
Әбдразақ Байболатовтың сөзінше, 2016 жылы сол кездегі қала әкімі Бауыржан Байбектің орынбасары Сұлтанбек Макежанов келіп, универсияда уақытында шу шығармауларын сұрап, жалынған. Барлық мәселе осыдан кейін басталған.
«2016 жылдың қараша айында трамплиннің өзіне барып, 2017 жылы универсияданы өткізбейміз деп брифинг жасадық. Сол күні бірден прокуратурадан, еңбек инспекциясынан және әкімшіліктен адамдар келді. Сөйтті де компания бұғаттап тастады. Макежанов Сұлтанбек ол кезде Бауыржан Байбектің орынбасары болатын. Ол бізді шақырып алып, «2017 жылы қалада универсияда болады, сендер миллиардтарды көтермеңдер, жұмысшыларыңның ақшасын үш айда шешіп беремін» деді. Содан концерт басталды...», - дейді Байболатов.
«Дан-Строй» АҚ және «Тол-Құрылыс» ЖШС қазір жұмыс істеп тұрған жоқ. Компания өкілдері «үкімет ақша бермегендіктен компания жұмысын тоқтатуға мәжбүр болды» дейді. Ал Алматы қаласының әкімдігі бұған дейін «компанияның қазіргі статусы істі шешуге кедергі болып отырғанын және мәселе қала әкімінің бақылауында екенін» айтқан.
MalimBlocks
