Жастар қай уақытта да жаңаның басы болғаны белгілі. Президент Қасым-Жомарт Тоқаев "Қазақстан - дарынды жастардың мекені. Біз олардың өрісін ашып, қарым-қабілетін шыңдау үшін бар мүмкіндікті жасауға тиіспіз" деп, үнемі қолдау білдіріп келеді. Реформа жасайтындар да, әлемдік трендтерді алдымен сезініп, басқалардан бұрын қабылдап, қоғамға енгізетін де солар, кез келген жаңашылдыққа қатысты қоғамдық пікір қалыптастыратын да солар. Және олардың ең үлкен артықшылығы – кейінгі жас балаларға үлгі бола алатыны. Бір ғана мысал келтірейік, мектеп жасындағы балалардың еліктейтін, үлгі тұтатын, тәпті, жанкүйері болатын белгілі адамдардың дені – жалындап тұрған жастар. Тіпті, мектептердегі белсенді оқушылардың өзі өзінің ізін басып келе жатқан іні-қарындастарына үлгі болады. Бүлдіршіндер алдындағы ағаларына қарап бой түзейді, солар сияқты сөйлеп, солар сияқты киінгісі келеді. Демек, жастар тобына жататын азаматтардың өзін өзі ұстауы, жетістікке жетуі – елдің ертеңі үшін де маңызды.
Енді, біз айтып отырған жастарды кім тәрбиелейді дегенге келсек. Әрине, оларды тәрбиелейтін үлкен буын. Ақыл тоқтатқан, тәжірибесі ғана емес, материалдық мәселелерде де белсенді, қолында түрлі ресурсы бар азаматтар. Әрине, бұл жерде мемлекеттік саясаттың ең басты роль атқаратыны айтпаса да түсінікті. Демек, мемлекеттік саясат буын арасындағы байланысқа ерекше мән беру керек. Абай айтқан «Алдынғы толқын ағалар, кейінгі толқын інілер», Мағжан Жұмабаев айтқан «Толқыннан толқын туады, толқынды толқын қуады» категориясы – өмірдің заңы. Демек, қай уақытта да алдынғы буын өзінен кейінгі буын үшін зор жауапкершілікке ие. Ал, мемлекеттік саясат осылардың бәрінің алдында жауапты. Сол себепті, үкіметте қабылданатын шешімдер, қаралатын мәселелердің бәрінің түбі барып елдің ертеңдері – жастарға тіреледі.
Мемлекеттік жастар саясатының негізгі ұстанымы – бәсекеге қабілетті, ойы еркін, ақылы кемел, материалдық тұрғыда тәуелсіз, өзін өзі дамытуға мүмкіндігі бар азамат қалыптастыруды көздейді. Бұл туралы 2023-2029 жылдарға арналған Мемлекеттік Жастар саясатының тұжырымдамасы да бекітілген. Ендігі мәселе, соны іске асыруға байланысты.
Үкіметтің кезекті отырысында осы мәселеге ерекше мән берілгені белгілі. Қазақстанның премьер-министрі Әлихан Смайылов арнайы бағыттарды белгілеп, мән-маңызына тоқталса, ҚР Ақпарат және қоғамдық даму министрі Дархан Қыдырәлі арнайы баяндама жасап, тұжырымдамада айтылған, белгіленген мәндеттерге сараптама жасады.
Премьер-министр Әлихан Смайылов жастарды тәрбиелеудің ең негізгі шарты – олардың бос жүрмеуі керектігін, уақытын тиімді өткізуі жайлы айтты. Жас отандастарымызды қолдау, оларды жұмыспен қамту, білім алуына, өзін толыққанды азамат сезінуіне мүмкіндік жасау мемлекеттік саясаттың негізгі мәндеті.
«Ең алдымен, жастарды жұмысқа орналастырудың жүйелі тәсілі қажет. Тұжырымдамада 2,3 млн-ға жуық жасты жұмыспен қамту жоспарланған. Бұл өте маңызды аспект, оны барынша тиімді жүзеге асыру керек. Түрлі жобалар мен бағдарламаларды іске асыруға мемлекеттің бөліп отырған ресурстары қомақты, жұмыс істемейтіндер мен оқымайтындар санын азайтуға ықпал етуге тиіспіз. Тұжырымдамада республика бойынша осындай жастардың үлесін 3,5%-ға дейін төмендету міндеті қойылған. Бірақ бұл үшін шаблонмен жұмыс істеуге болмайды. Әр өңірдегі жастармен жұмыс істеу ерекшелігіне барынша икемделу қажет. Сонымен қатар жастарды қолдау шараларын жақсарту үшін үзбей жұмыс істеу керек», — дейді үкімет басшысы.
Премьер-министр тиісті ведомсвоға өңірлермен жұмысты жандандыра түсу керектігі жайлы айтты. Өз кезегінде Ақпарат және қоғамдық даму министрі Дархан Қыдырәлі аталмыш тұжырымдаманың маңызына тоқталып, ондағы негізгі міндет-мақсаттар туралы айтты. Оның айтуынша, бұл тұжырымдаманың жасалуына ықпал еткен нәрсе – реформалық өзгерістерге байланысты. Яғни, жастар саясаты туралы заңға өзгерістер енгізілген, осының негізінде арнайы жаңа тұжырымдама дайындалып, бекітіліп отыр.
«Тұжырымдама 7 бағыт, 12 индикатор мен 80 іс-шарадан тұрады. Оның негізгі бағыттарының бірі – ауыл жастарын кәсіби тұрғыда дамыту, кәсіпкерлік арқылы олардың әлеуетін іске асыру, оқусыз, жұмыссыз жастарды қолдау. Сондай-ақ «Заманауи құндылықтар және патриоттық тәрбие», «Салауатты өмір салты» бағыттары бойынша да бірқатар жұмыстар жүзеге асады деп жоспарлап отырмыз», - дейді министр.
Астана қаласы әкімдігі Жастар саясаты мәселелелері басқармасы да жас буынның жан-жақты дамуына үлес қосып келеді. Жастар шығармашылығын қолдау бойынша түрлі конкурстар, көңілді тапқырлар клубтары, жыр мүшәйралары жиі өткізіледі. Жақында қаламыздағы балалар мен жасөспірімдердің уақытын тиімді өткізу үшін Аула клубтары ашылды. Қазіргі кезде ұзын саны 25 аула клубы жұмыс істейді. Онда 3100 бала тәрбиеленіп жатыр. Ал жас дарындардың талантын шыңдайтын 124 үйірме мен секция бар. Қаладағы әрбір ауданда жастардың уақытын оңтайлы өткізуіне, салауатты өмір салтымен айналысуына барлық жағдай жасалған.
Жастарға қатысты өзгермейтін қағида бар: «Сен маған жастарыңды көрсетші, мен саған еліңнің ертеңін айтып берейін» деп келеді. Демек, міне деп көрсететін жастарымыздың тағдыры мемлекеттің тағдыры екені даусыз.
Байланысты жаналықтар
MalimBlocks
