Тоқаев Сара Назарбаеваны комиссиядан шығарып жіберді
Президент Қасым-Жомарт Тоқаевтың жарлығымен Әйелдер істері және отбасы-демография саясаты жөніндегі комиссия құрамынан бірнеше адам шығарылды. Олардың қатарында бұрынғы президент Нұрсұлтан Назарбаевтың әйелі Сара Назарбаева бар.
Айта кетейік, Әйелдер істері және отбасы-демография саясаты жөніндегі комиссия 2006 жылы құрылған. Сол жылы Нұрсұлтан Назарбаевтың 1 ақпандағы №56 жарлығымен комиссия құрамы бекітілген. Ресми тізімнің орта тұсына Сара Алпысқызы Назарбаева да енген. Тоқаевтың комиссиядан шығару туралы жарлығында да Назарбаеваның аты орта тұста жазылыпты.
Бұған қоса, комиссиядағы жұмысын Қазақстан адам құқықтары жөніндегі уәкіл Эльвира Әзімова, "Қазпошта" директоры Айда Әбибуллаева, скрипкашы Айман Мұсақожаева, "Отбасы банкі" басқарма төрайымы Ләззат Ибрагимова және тағы 20 шақты адам тоқтатты. Олардың орнына президент жаңа кандидаттарды ұсынды.
Оқи отырыңыз: Қамаудағы Сатыбалды «Қазақтелекомды» мемлекетке қайтарып беруге әзір
Осыған дейін комиссия жетекшісі болған Ләззат Рамазанова да қызметінен бір саты түсіп, төраға орынбасары болды. Ал жаңа басшы болып президент әкімшілігі жетекшісінің орынбасары Айда Балаева тағайындалды.
81 жастағы Сара Назарбаева соңғы жылдары көпшілік назарынан тыс қалған. Тек жылына бір рет өз туған күні қарсаңында «Бөбек» қайырымдылық қорында болатын жиналыстарға қатысатын. Күйеуі Нұрсұлтан Назарбаевпен бірге ресми сапарларға баруды да тоқтатқан.
