Брейкинг арқылы ауылдан шыққан жолымды көрсеткім келді – Амир Закиров

Париж Олимпиадасында брейкингтен сынға түскен Қазақстан командасының мүшесі Амир Закиров өз жарысын қорытындылады, деп хабарлайды Malim.kz.

Оның айтуынша, өнері өзіне ұнайды. Дегенмен, төрешілердің өз талабы бар. Жеңу үшін белгілі бір би түрін көрсету қажет.

Ал, мен әркез өз қалауымша билеуге тырысамын, спортта болу керек ережелердің жетегінде кеткім келмейді. Өкінішке қарай, сол ережеге сай мен бірінші, екінші не үшінші орында да емеспін. Бірақ өзіме көңілім толды, дейді ол.

Оның сөзінше, шағын мемлекеттердің өкілдеріне бұндай деңгейде өнер көрсету қаншалықты қиын екенін сезінеді, қысым жоғары. Ал Еуропа, Америка үшін бұл қалыпты жағдай.

Бүгінгі менің мақсатым жеңіс емес, осы Олимпиаданы, брейкингті тамашалаған жас ұрпақты шабыттандыру. Спортшы үшін сәл ерекше киіндім. Үстімдегі киімнің бәрін достарыммен жасадық, дейді ол.

Айтуынша, оның кеудесінде еңбекшіл ауыл бейнеленген. Балалық шағы өткен үйінің суреті бар.

Өкінішке қарай, бірнеше жыл бұрын бұл жерде өрт шықты. Оқыс жағдай кезінде әкем мен атам көз жұмды. Сондықтан, бүгін брейкинг арқылы өз отбасымды, ауылдан шыққан жолымды көрсеткім келді. Мен үшін бұл өте маңызды. Бұл қолымнан келді деп ойлаймын, деді Закиров.

Айта кетейік, жерлесіміз СҚО тумасы. Ол ширек финалда америкалық  Victor-ға қарсы шыққан болатын. Үш раунд өткізіп, қарсылас 3:0 есебімен жеңіске жетті.

Фото: Тұрар Қазанғапов