Елімізде ойын мекемесі, букмекерлік кеңсе немесе тотализатор жұмысының, мөлшерлемелер қабылдаудың және өткізілетін құмар ойындарының және бәс тігудің үлгілік қағидалары жазылды. Туризм және спорт министрі бұйрығының жобасы Ашық НҚА порталында жарияланды, деп хабарлайды, Malim.kz.
Құжат мәтіні бойынша, ойын мекемесі, букмекерлік кеңсе немесе тотализатор құмар ойынға бәс тігуге қатысушының деректерін жеке тұлғаның жеке куәлігінде көрсетілген ақпараты негізінде Ойын мекемесі, букмекерлік кеңсе немесе тотализатор жұмысының қағидаларымен айқындалған құмар ойнына бәс тігуге қатысушыны тіркеу нысанына енгізеді.
Құмар ойынға және бәс тігуге қатысушыны тіркеу нысанында:
тегі, аты, әкесінің аты (бар болса);
жеке сәйкестендіру нөмірі;
туған күні, жасы;
тұрғылықты жерінің заңды және нақты мекенжайы;
қызмет түрі, жұмыс орны;
құмар ойынға және (немесе) бәс тігуге қатысушының құмар ойындарға және (немесе) бәс тігуге қатысуы шектелген адамдардың тізілімінде болуы немесе болмауы туралы мәліметтер;
құмар ойынға және (немесе) бәс тігуге қатысушының Борышкерлердің бірыңғай тізілімінде болуы немесе болмауы туралы мәліметтер;
ойын мекемесіне келу күні мен нақты уақыты (құмар ойынға және (немесе) бәс тігуге қатысушының келу және кету уақыты);
құмар ойынға және (немесе) бәс тігуге қатысушының банктік деректемелері (шот нөмірі) көрсетіледі.
Тіркелетін азаматқа қатысты мәліметтер құмар ойындарға және бәс тігуге қатысуы шектелген адамдардың тізімінде, Борышкерлердің бірыңғай тізілімінде болған жағдайда ойын мекемесі, букмекерлік кеңсе немесе тотализатор тіркеуден бас тартады және құмар ойындарға және бәс тігуге қатысуға жол бермейді.
Толық мәліметпен құжат мәтінінен танысып алуға болады.
Фото: meta-ratings.kz
