Танымал боксшы Бақтияр Артаев "Дикий Арман" үшін қызметінен кеткен

Боксшы Бақтияр Артаев «Қаңтар» оқиғасынан кейін Қазақстан бокс федерациясының вице-президенті және мемлекеттік бапкер қызметінен кеткен болатын. Ол «Уақыт көрсетеді» арнасына берген сұхбатында жұмысынан кетуіне не себеп болғанын айтты, деп хабарлайды Malim.kz.

Боксшының Қаңтар оқиғасына қатысы бар деп күдікпен ұсталған «Дикий Арманды» қолдап пост жазуы мансабына кері ықпалын тигізген. 

Кім кіммен араласпай жатыр? Таза ақымақтық. Ашығын айтайық, түнгі сағат екіде қорқор (кальян) шегіп отырып, сол кездегі Спорт комитетінің басшысы хабарласты. «Дикий Арманмен» араласады екенсің, жұмысты босатуың керек» деп айтты. Айлығым 180 мың теңге болды. Шетелде мен сияқты маманды 10 мың доллар төлеп шақырар еді. «Токиодан жылап келдіңдер. Ұлттық Олимпиада комитеті мен министрлік кінәні бір-біріне жауып сілтедіңдер. Алтын жоқ. Араға 2 сай келіп, Сербиядағы әлем біріншілігінен екі алтын алып бердім. Сонда 180 мың төлеп, осының өзін артық көріп кеттіңдер ме?» дедім. Мейлі деп, трубканы қойып, арызымды жазып бердім, - дейді Бақтияр Артаев.

Еске салсақ, Бақтияр Артаев 2022 жылы ақпанда Бокс федерациясының вице-президенті қызметінен кеткен еді. Ал Арман Жұмагелдиев Қаңтар оқиғасына қатысты екі жарым жылдан бері тергеу изоляторында жатыр.

Фото: ОКҚ