Белгілі беларусь жазушысы, Нобель сыйлығының иегері Светлана АЛЕКСИЕВИЧ президенттік сайлаудан кейінгі митингіге қатысты пікір білдірді. Қаламгер ойы фейсбуктағы парақшасында жарияланды.
«Интернет өшкелі жатыр. Түнімен Минскіде әскери техникалар жүрді. Күштік құрылым қаланы қоршап алды. Көшедегі көліктерден Виктор ЦОЙДЫҢ «Перемен! Мы ждем перемен!» әні шырқалды. Мен халқымды жақсы көріп барамын», - делінген жазушының фейсбук парақшасында.
Беларусь қалаларындағы митингілер кеше мемлекеттік экзит-поллдың мәлімдемесінен кейін басталды. Орталық сайлау комиссиясы қортында жасамай тұрып, Александр ЛУКАШЕНКО 79,9 пайыз дауыс жинады деген хабар халықтың наразылығын тудырды.
Ресми мәлімет бойынша Беларусь Республикасының 80 пайыздан аса халқы дауыс берген. Митинг кезінде Минсктің көшелері жабылып, метро жұмысы тоқтады. Және байланыс өшірілді. Күштік құрылымдар көзді ашытатын газ бен резеңке сойыл қолданды. «Говорите громче» халықаралық қозғалысының хабарлауынша бір адам полициямен қақтығыс кезінде көз жұмыпты.
Белорусь ОСК ширек ғасырдан бері билікте келе жатқан Александр Лукашенко 80,2 пайыз дауыс жинағанын, ал оппозиция лидері Светлана ТИХАНОВСКАЯ 9,9 пайызға ие болғанын мәлімдеді.
2015 жылғы Нобель сыйлығының иегері Светлана Алексиевич Александр Лукашенко саясатын сынап келеді. Бір кездері жазушының кітабын шығаруға билік тыйым салған. Сондай-ақ, жазушы Украинадағы соғысқа ресми Кремльді кінәлі деп мәлімдеген еді.
Фото ғаламтордан алынды.
