19 маусым күні Түркия Республикасынан бірнеше алаяқтық қылмыс жасады деген күдікпен халықаралық іздеуде жүрген ер адам Қазақстанға жеткізілді, деп хабарлайды Malim.kz.
Күдікті Қазақстан Республикасы ІІМ Интерпол Ұлттық орталық бюросының сұрауы бойынша Түркияның Самсун қаласында ұсталған. Оны елге қайтару жұмыстарын ұйымдастыруға ҚР ІІМ-нің Түркиядағы өкілі мен Қазақстан Республикасының Елшілігі қолдау көрсеткен.
Тергеу нұсқасына сәйкес, күдікті 2024 жылдың қыркүйек-желтоқсан айлары аралығында ақпараттық жүйелер мен Instagram әлеуметтік желісіндегі аккаунтын пайдаланып, Атырау қаласының екі тұрғынын алдап, олардың 3 миллион теңгеден астам қаражатын иемденген.
Қазіргі уақытта ер адам ұсталып, Алматы қаласы полиция департаментінің уақытша ұстау изоляторына қамалды.
Қазақстан Республикасы Ішкі істер министрлігі шетелде жасырынып жүрген және қылмыстық жауапкершіліктен жалтарып жүрген адамдарды анықтау және ұстау жұмыстары жалғасатынын мәлімдеді.
