Қазақстандық заңгер әрі қоғам белсендісі Мейірман Шекеевке қатысты қылмыстық іс қозғалғаны белгілі болды, деп хабарлайды Malim.kz.
Заңгер өзіне тағылған айыптармен келіспейтінін айтып, істің оның қоғамдық қызметіне байланысты болуы мүмкін екенін мәлімдеді.
Шекеевтің айтуынша, ол өзіне қатысты процесте заң аясында қорғанып, ұстанымын дәлелдеуге ниетті.
Қазіргі таңда қылмыстық істің нақты қандай бап бойынша қозғалғаны, оның мән-жайы және Шекеевтің процессуалдық мәртебесі жөнінде құзырлы органдардың ресми түсіндірмесі жарияланған жоқ. Осыған байланысты заңгердің мәлімдемесі әзірге тараптардың бірінің ұстанымы ретінде қарастырылады.
Айта кетейік, Мейірман Шекеев — заңгер, адвокат және қоғам белсендісі. Ол қоғамда кең талқыланған бірқатар істерге қатысып, жәбірленушілердің құқықтарын қорғаған. Соның ішінде Шерзат Полаттың өліміне қатысты қылмыстық іс бойынша жәбірленуші тараптың өкілі болды.
Істің құқықтық негізіне түпкілікті бағаны тергеу органдары мен сот береді. Редакция оқиғаның барлық мән-жайын анықтау мақсатында құзырлы органдарға сауал жолдады. Материалға қатысты ресми ақпарат түскен жағдайда жаңартылады.
