Жамбыл облысындағы Күйік асуының ескі бағытына жарты ғасырдан кейін алғаш рет күрделі жөндеу жүргізіліп, жаңартылған учаске пайдалануға берілді. Бұл жол халықаралық «Өзбекстан – Қазақстан – Қытай» көлік дәлізінің маңызды бөлігі саналады, деп хабарлайды Malim.kz.
Күйік асуы Шымкент пен Тараз қалаларын байланыстырып қана қоймай, Алматы, Жамбыл, Түркістан және Қызылорда облыстары арасындағы негізгі көлік қатынасын қамтамасыз етеді. Әсіресе жүк тасымалы үшін стратегиялық маңызы зор бағыт ретінде белгілі.
Аталған жол учаскесі 1970-жылдары пайдалануға берілген болатын. Содан бері ауқымды жаңғырту жүргізілмегендіктен, оның жағдайы ұзақ жылдар бойы тұрғындар мен жүргізушілердің сынына ұшырап келген. Қыс мезгілінде қозғалыстың қиындауы мен жол қауіпсіздігі мәселелері жиі көтерілген.
Көлік министрлігінің мәліметінше, жөнделген жолдың ұзындығы 12,3 шақырымды құрайды. Жоба аясында 15 су өткізу құбыры салынды. Бұл инфрақұрылым маусымдық жауын-шашын кезінде суды тиімді өткізіп, жолдың төзімділігін арттыруға мүмкіндік береді.
Құрылыс барысында заманауи материалдар қолданылған. Атап айтқанда, қиыршық тас-құм қоспасы, ірі түйіршікті асфальтбетон және ЩМА-20 маркалы қиыршық-мастикалық асфальтбетон пайдаланылды.
Жобаға 182 маман мен 150 арнайы техника жұмылдырылды. Құрылыс жұмыстары кезінде 130 мың тонна асфальтбетон төселіп, 155 мың текше метр топырақ, 4 мың тонна битум, 3,7 мың тонна цемент және 120 мың тонна қиыршық тас пайдаланылған.
Салтанатты рәсімде сөз сөйлеген Көлік министрлігі Автомобиль жолдары комитеті төрағасының орынбасары Дархан Иманашев бұл бағыттың өңір тұрғындары мен халықаралық транзит үшін маңызын ерекше атап өтті.
Оның айтуынша, жаңартылған жол көлік қозғалысының қауіпсіздігін күшейтіп, транзиттік тасымал тұрақтылығын арттырады әрі өңіраралық байланысты жақсартуға ықпал етеді.
Айта кетейік, Ескі Күйік асуында жүк көліктерінің орташа тәуліктік қозғалысы 2 273 көлікті құрайды. Бұл аталған бағыттың жоғары жүктемесін және жүргізілген жөндеу жұмыстарының стратегиялық маңызын көрсетеді.
Жаңартылған жолдың іске қосылуы Жамбыл облысының транзиттік әлеуетін арттырып, Алматы – Тараз – Шымкент – Түркістан бағыты бойынша қатынайтын жүргізушілер мен туристер үшін қолайлы жағдай қалыптастырады.
