Airbus компаниясының шұғыл директивасына сәйкес, ұшақтарға келесі рейске дейін бағдарламалық қамтамасыз етуді жаңарту міндеттелді, деп хабарлайды Malim.kz.
Соның салдарынан Air Astana және FlyArystan әуе компанияларының рейстері кешігуі ықтимал.
Астана әуежайы штаттық режимде жұмыс істеп жатыр. Әуе компанияларында бағдарламалық жасақтаманы жаңарту жедел қарқынмен жүргізілуде. Қазіргі уақытта KC 931 және FS 7063 рейстеріне пайдаланылатын екі әуе кемесінде жаңарту аяқталды. Қалған ұшақтарға жаңарту жұмыстары кезең-кезеңімен жалғасуда.
Азаматтық авиация комитетінің мәліметінше, барлық қызметтер тәулік бойы жұмыс істеп, жаңартуды барынша тез аяқтау үшін шаралар қабылдауда. Жұмыстар Airbus компаниясының ұшуға жарамдылық директивасына сәйкес және КГА мен Қазақстанның авиациялық әкімшілігі мамандарының бақылауымен жүргізіліп жатыр.
Әуе компаниялары рейстер кестесіне әсерін азайтуға тырысуда. Жолаушыларға рейс мәртебесін әуе компанияларының ресми ресурстарынан алдын ала тексеру ұсынылады. Комитеттің мәлімдеуінше, бұл шаралар ұшулар қауіпсіздігін арттыруға бағытталған.
