Астанада цифрлық қауіпсіздікке арналған дәрістер өткізілді

Астанада 9 қазан күні «Jarqyn Bolashaq» жобасы аясында білім беру лекцияларының сериясы басталды. Жобаның мақсаты – елордалық жастар мен балаларды интернетке тәуелділік, құмар ойындар және кибербуллингтен қорғау.

Шара аясында Астана қаласы әкімдігінің, Жастар саясаты басқармасының қолдауымен және киберқауіпсіздік сарапшыларының, психологтардың және қоғам қайраткерлерінің қатысуымен студент жастарға арналған лекциялар өткізілді.

Жоба жастардың цифрлық қауіпсіздік туралы білімін арттыруға, киберқауіптер мен интернеттегі құмар ойындардың зияны туралы ескертуге бағытталған. 

«Jarqyn Bolashaq» жобасы жастарға тек бар қауіптер туралы білуге ғана емес, сонымен қатар олардың алдын алу үшін қажетті білім мен құралдарды алуға, психикалық және физикалық денсаулықтарын сақтауға мүмкіндік береді. 

Дәріс интерактивті кездесулер форматында өтті, қатысушылар цифрлық қауіпсіздік пен психология саласындағы сарапшылардан ақпарат алып қана қоймай, өздерін толғандырған сұрақтарды қойды, нақты өмірдегі мысалдарды талқылап, мәселелерін шешу бойынша пайдалы кеңестер алды. 

Жастарды қауіпті үрдістен қорғау туралы психолог, магистр, аддиктолог Ассалау Дәурен, психолог, когнитивті мінез-құлық терапия маманы, гипнотерапевт Светлана Литвинова   дәріс оқыды.

Лекцияларда бірнеше  негізгі тақырыптар қамтылды: Кибербуллинг және оның салдары – кибершабуылдарды, онлайн-қатерлер мен зорлық-зомбылықты тану, сондай-ақ құрбандарға қолдау көрсету және қорғау әдістері. Интернетке тәуелділік және оның алдын алу – цифрлық тәуелділік мәселелерін талқылау, интернетте уақытты тиімді басқару стратегиялары мен технологияларды өнімді пайдалану жолдары. Онлайн құмар ойындарының қауіптілігі – лудоманиядан қалай сақтану, заңсыз ойын платформаларын тану және құмар ойындардың психикалық денсаулық пен әлеуметтік өмірге қалай әсер ететінін түсіну.  

Фото: Астана қаласы әкімдігі