Челлендж: 2 миллионға жуық бала бір уақытта күй орындады

Еліміздегі барлық білім беру ұйымында «Күйкүмбірі» республикалық челленджі өтті. Бір уақытта екі миллионға жуық бала Құрманғазының «Балбырауын», «Адай», «Сарыарқа» күйлерін орындады, деп хабарлайды Оқу-ағарту министрлігінің баспасөз қызметі.

Астанадағы Райымбек батыр атындағы №50 «Қазғарыш» мектеп-лицейі оқушыларының қатарына Оқу-ағарту министрі Ғани Бейсембаев қосылды. Министр соңғы уақытта елімізде домбырада ойнағысы келетіндердің саны едәуір артқанын атап өтті.

- Біздің оқушыларымыз, олармен бірге балабақшалардың кішкентай тәрбиеленушілері, колледж студенттері ұлттық аспапта ойнауға қызығушылық танытатыны қуантады. Бүгінде еліміздің әр өңірінде бір мезетте күй мен танымал композиторлардың шығармалары шырқалды. Олардың туындылары арқылы біздің мәдени құндылықтарымыз ұрпақтан-ұрпаққа беріледі. Біздің өскелең ұрпақ осы киелі өнерді ұлықтауды лайықты түрде жалғастырады деп сенемін, - деді Ғани Бейсембаев.

Челлендж соңында министр мектептің 300 оқушысымен бірге халық күйін орындады. Мерекелік эстафетаға екі миллионға жуық қазақстандық бала қосылды. Ең кішкентай қатысушылар - Семей қаласындағы «Бақыт» балабақшасының тәрбиеленушілері.

Еске салайық, домбырашылар челленджі әз-Наурыз қарсаңында ұйымдастырылатын республикалық акция.

ФОТО: Оқу-ағарту министрлігі