Домбыра құлағында ойнайтын Чили азаматшасы желідегілерді тәнті етті

Домбыраның құлағында ойнайтын Чили азаматшасы желідегілерді тәнті етті, - деп хабарлайды Malim.kz тілшісі. 

Қазақтың қара домбырасының үні сонау Чили елінен шығып жатыр. Күйді күмбірлетіп отырған Андреа – Сантьяго қаласының тұрғыны. Қос ішекті аспапқа Димаштың өнерін көргеннен кейін қызыққан.

"Димаштың өнерімен таныс болған соң, домбыра шертуді үйрендім!"- дейді ол. 

 Осылай деген Чилилік Андреа Луенго, қос ішекті аспапты меңгеріп, қазақ мәдениетін зерттеп-зерделеп жүр. Арманы – қазақ тілін үйрену, Димашпен кездесу. 

Еске салайық, бұған дейін Қазақстандағы қолөнер шебері Нұрбек Әділбековтің шеберханасынан шыққан домбыраны тапсырыспен Чилиге алдырған Мария есімді домбырамен жылап қауышқан еді. 

"Жарты жыл бұрын алыстағы Чили елінен Мария ханым бізбен байланысып, домбыра алғысы келетінін айтқан еді. Көп ұзамай оның таңдауы біздің аққудай ақ домбырамызға түсті. Бір көргеннен ғашық болғандай әсер қалдырған бұл домбыра оған ерекше ұнап, біз оны үлкен сүйіспеншілікпен дайындап, салып жібердік. Арада айлар өтіп, ақ домбырамыз аман-есен өз иесіне жетті. Сол сәтте Мария ханымның домбырамен қауышқан кезіндегі эмоциясы бәрімізді ерекше әсерге бөледі. Оның ұлттық аспапқа деген шексіз махаббатын сөзбен жеткізу қиын, оны тек көзбен көріп, жүрекпен сезу керек", - деп жазды Нұрбек шебер.

Бұдан кейін Мария ханым шеберханаға тағы да ерекше тапсырыс берген екен. 

Фото: Видеодан алынған кадр