Президент Қасым-Жомарт ТОҚАЕВ Ұлттық құрылтайда еліміздің кино саясатына қатысты алаңдаушылығын білдірді.
-Тағы бір түйткіл – қазір кинотеатрда көрсетілетін фильмдерге қатысты қоғамдық сын бар. Былтыр қазақстандық мамандар түсірген 94 фильм шыққан, яғни, негізінен өзіміздің өнім шығарылып жатыр. Бұл – жақсы үрдіс. Бірақ біз ең алдымен санға емес, сапаға көңіл аударуымыз керек. Көрерменнің көңілін көтеріп, күлкі сыйлау – бір бөлек, жағымсыз әдеттерді насихаттау, – бір басқа деді Мемлекет басшысы.
Президенттің бұл пікіріне орай Парламент мәжілісінің депутаты Жанарбек Әшімжан өз ойын бөлісті.
"Естеріңізде болса қаңтар айында еліміздің кино саясатына қатысты Премьер-министрге арнайы депутаттық сауал жолдаған едім… Үкіметімнің құлағы “мүкістеу” болғандай көрінген…
Есесіне Президент ұлттық мақсат-мұрат жолындағы маңызды мәселеге қатысты салаға жауапты органдарға Құрылтай төрінен нақты міндеттер жүктеді", -деді депутат.
Құрылтайда Тоқаев зорлық-зомбылықты, қатыгездік пен қылмысты насихаттайтын фильмдер де пайда болғанын айта келіп, бір нәрсені ескеруге шақырды.
Бүгінде фильмдердің басым көпшілігі мемлекеттік тапсырыспен емес, жеке қаржыға түсірілуде. Кино маңызды идеологиялық құрал екенін бәріміз жақсы түсінеміз. Сондықтан жеке қаржыға түсірілсе де, фильмді кинотеатрға шығармас бұрын алдын ала сүзгіден өткізу жолдарын қарастырған жөн,- деді Президент.
Фото: Ақорда
