Жаңа адамдар Жаңа Қазақстанды бірігіп салмақ
Астанадағы «Хан Шатыр» сауда ойын-сауық орталығы қайбір күні жаңа адамдарға толып қалды. «Жаңа Адамдар» деп өздеріне ат қойып алған жастар қозғалысы жаңа адамдармен «Қазақстанды бірге салайық» деген бастама көтерді.
Жастар қозғалысының жаңа адамдар деп отырғаны сәбилер мен бүлдіршіндер. Олардың айтуынша, олар жаңа Қазақстанда өмірге келді, енді жаңа Қазақстанды бірігіп салады. Бесіктен белі шықпаған бала жаңа Қазақстанды қалай салсын? Жастар қозғалысы бұл сұраққа жауапты оңай жерден тауыпты. Олар «Қазақстанды бірге салайық» бояу кітапшасының тұсаукесерін кесті. Сосын, 4-12 жас аралығындағы балалардың қолына түрлі түсті қарандаш ұстатып, «жұмысқа» салып қойды. Балалар бұл жұмысқа құлшына кірісті. Әсіресе, «Өмірлік қиын жағдайға тап болған балаларды қолдау орталығы» мекемесінен келген балалар шығармашылық тапқырлықтарымен ерекше көзге түсті.
«Халқымызда «Ел боламын десең, бесігіңді түзе» деген мақал бар. Сондықтан мектепке дейінгі тәрбие саласы басымдықта болуы керек. Біз жай ғана балаларға арналған бояу кітапшасын дайындаған жоқпыз. Ондағы әрбір сурет балалардың нағыз қазақстандық болып өсуіне көмектесетін адами қасиеттер мен құндылықтардың бірін сипаттайды. Балалар суреттерін бояп отырып, осы қасиеттерді өздері үшін сынап көреді және жақсарады. Сонымен қатар, бұл ата-аналар үшін балаларымен ел болашағы туралы сөйлесуге себеп болады» дейді «Жаңа Адамдар» белсендісі Мирас Ахметов.
Байланысты жаналықтар
MalimBlocks
