ШҚО-да туристер көп келетін аймақта 1938 жылы салынған көпір опырылып құлады. Соның салдарынан туристік бағыттардың біріне қазір ешкім бара алмайды, деп хабарлайды Malim.kz.
YK-news.kz сайтының жазуынша, ШҚО Кәсіпкерлер палатасының мәліметінше, биыл Катонқарағай ұлттық саябағында Ақ Берел өзені арқылы өтетін ағаш көпір қар салмағын көтере алмай, опырылып құлаған. Көпір 1938 жылы салынған. Туристік агенттік өкілдерінің айтуынша, ол Мұзтаудың етегіндегі Көккөл базалық лагеріне жаяу және кері серуендеу үшін пайдаланылған. Қазір көпір құлаған соң Мұзтауға жаяу жету мүмкін емес.
Ұлттық саябақтың директоры Жанболат Тыныбековтің айтуынша, су тек 15 шілдеге қарай басылады, содан кейін ғана толық сараптама жүргізіледі.
Осыдан кейін ғана жобалық-сметалық құжаттаманы жасау, қаражат бөлу және жөндеу жұмыстары туралы айтуға болады, - деді ол.
Кәсіпкерлер табиғи саябақ өкілдерінен барлық бағыттардың, әсіресе Қаракөлдің жанындағы нығайтуды қажет етіп тұрған өткелдің қауіпсіздігін тексеруді сұрады.
Жанболат Тыныбеков 10 маусымға дейін барлық жол ашық болатынына сендірді.
Фото: silkadv.com
