Астанада қарбалас уақытта жүк көліктерінің жүрісі шектеледі
Шектен асқан көлік жүргізушілері айыппұл төлейді
Астанада жүк көліктеріне шекті салмақ мөлшері енгізіледі. Ондағы жалпы салмақ көліктің де, жүктің де салмағын қоса қамтиды. Бұл туралы қала әкімі Жеңіс Қасымбек әлеуметтік желідегі парақшасында жазды, деп хабарлайды Malim.kz.
Қала әкімінің жазуынша, ауыр және ірі көлемді көлік құралдары жүргізушілерінің көпшілігі жүктің салмақ параметрлерін сақтамайды. Мысалы, 25 тоннаның орнына 100 тоннаға дейін, тіпті одан да көп жүк тасымалдап жүруі мүмкін. Бұл бірқатар қолайсыздық әкеледі: жол қозғалысының өзге қатысушыларына қиындық тудырады әрі жолға үлкен жүктеме түсіреді.
Әкімнің айтуынша, елордада қыркүйек айынан бастап автокөлік өлшейтін автоматтандырылған жүйе іске қосылады. Жүйе қазірдің өзінде сынақ режимінде жұмыс істейді. Автоматтандырылған өлшеу жүйесі қалаға негізгі кіреберістерде – Павлодар, Қарағанды, Қостанай, Көкшетау, Қосшы қалалары, сондай-ақ, Қараөткел және Малотимофеевка ауылдары тұсында орнатылған. Соңғы айда 10 мыңнан астам заңбұзушылық тіркелген. Бұл жүйе жүк көліктерінің салмағын бақылауға, қаланың көлік инфрақұрылымының жалпы деңгейін жақсартуға, өзге де көліктердің кедергісіз жүруі үшін неғұрлым қолайлы жағдайлар жасауға мүмкіндік береді.
Бүгін Көлік министрлігінің, қала полициясының, тасымалдаушы компаниялардың және құрылыс компанияларының өкілдерімен кездестім. Жүк көліктерінің салмағын бақылау шараларын талқыладық. Қарбалас уақытта ауыр және ірі көлемді көлік құралдарының қозғалысына шектеулер енгізуді жоспарлап отырмыз, деп жазды Жеңіс Қасымбек.
Оның сөзінше, ауыр және ірі көлемді көлік құралдарының рұқсат етілген салмағы мына мөлшерден аспауы керек:
- үш осьті (М3 санатындағы буынды автобустарды қоспағанда) – 25 тонна;
- төрт осьті, оның ішінде екі басқарылатын осі бар – 32 тонна;
- бес осьті – 38 тонна;
- алты немесе одан да көп осьтері бар – 44 тонна.
Осылайша, жалпы салмақ жүктің де, көліктің де салмағын қамтиды.
Артық салмақ болған жағдайда 3 миллион 700 мың теңгеге дейін айыппұл салынады. Айыппұл мөлшері оське шаққандағы салмақтың арту дәрежесіне және кәсіпкерлік түріне байланысты – шағын, орта немесе ірі – 40 АЕК-тен (147 мың 680 теңге) 1000 АЕК-ке (3 млн 692 мың теңге) дейін өзгеруі мүмкін.
Фото: egemen.kz
