Бас прокуратура Кәрім Көкірекбаевтың ақталып шығуына қарсы

Прокуратура Кәрім Көкірекбаевтың ісі бойынша үкімге наразылық білдіреді, деп хабарлайды Malim.kz.

Алматы облысының қылмыстық істер жөніндегі мамандандырылған ауданаралық соты 7 маусымда алқабилердің қатысуымен Төтенше жағдайлар министрлігінің «Қазселденқорғау» мемлекеттік мекемесінің бұрынғы басшысы К.Н. Көкрекбаевқа қатысты ақтау үкімін жариялаған еді.

Ол адамдармен топтасып аса ірі мөлшерде бірнеше рет пара алды деп айыпталған.

Прокуратура соттың бұл үкіміне оның күшін жою туралы апелляциялық өтінішхат түсіреді, деп жазды Бас прокуратура.

Айта кетейік, «ҚР ТЖМ Қазселденқорғау»  мемлекеттік мекемесінің бұрынғы директоры Кәрім Көкірекбаев үлкен көлемде пара алды деген күдікпен 2022 жылдың желтоқсанында ұсталған еді.

Кәрім Көкірекбаев 2013-2018 жылдары Жамбыл облысының әкімі болған. 2019 жылдың тамыз айынан бастап «Қазселденқорғау» мемлекеттік мекемесін басқарып келді. Бұл тағайындауға дейін ол Қазақстанның Қырғызстандағы елшісі қызметін атқарған болатын.