Тұмау тигенде көпшілік лимон қосылған шайға, сарымсақ пен ыстық сорпаға жүгінеді. Алайда бірде-бір тағам тұмауды өздігінен емдемейді. Құнарлы ас ағзаны қажетті қоректік заттармен қамтамасыз етіп, ал жеткілікті сұйықтық сусызданудан сақтануға көмектеседі, деп Malim.kz тілшісі Гарвард университетінің тамақтану жөніндегі материалына және Ұлыбританияның Ұлттық денсаулық сақтау қызметіне – NHS сілтеме жасап хабарлайды.
Тауық сорпасы
Тәбет төмендегенде жылы тауық сорпасын ішу ыңғайлы болуы мүмкін. Ол ағзаға сұйықтық береді, ал құрамындағы тауық еті мен көкөністер ас мәзірін қоректік заттармен толықтырады.
Дегенмен сорпа тұмау вирусын жоймайды. Гарвард мамандары тауық сорпасының басқа тағамдарға қарағанда аурудан тезірек айықтыратынын дәлелдейтін клиникалық зерттеулер жоқ екенін түсіндіреді. Оны ауырған кездегі тамақтанудың бір нұсқасы ретінде қарастырған дұрыс.
Апельсин, киви және тәтті бұрыш
С дәрумені тек лимонда болмайды. Апельсин, киви, тәтті бұрыш, брокколи мен құлпынай да осы дәруменнің көздеріне жатады. С дәрумені иммундық жүйенің қалыпты жұмысына қажет.
Алайда жемісті көп жеу немесе С дәруменін жоғары мөлшерде қабылдау тұмаудан міндетті түрде қорғайды деуге болмайды. АҚШ Ұлттық денсаулық институттары дәрумен тапшылығы жоқ адамдарда қоспаларды көбейту инфекцияның алдын алуға немесе одан тезірек айығуға көбіне көмектеспейтінін жазады.
Жұмыртқа, балық және бұршақ
Ауырған кезде ас мәзірінің құнарын да ескерген жөн. Жұмыртқа, балық, тауық еті, жасымық пен бұршақ — ақуыз көздері. Ақуыз иммундық жасушалардың өсуі мен қызметіне қажет қоректік заттардың қатарына кіреді.
Күнделікті мәзірге осы өнімдердің өзіңізге қолайлысын қосуға болады. Мәселен, жұмыртқаны таңғы асқа, ал балықты немесе бұршақты негізгі асқа таңдауға болады. NHS оларды теңгерімді тамақтанудың бір бөлігі ретінде ұсынады.
Айран және табиғи йогурт
Тірі дақылдары бар айран мен йогурт ішек микробиотасына пайдалы бактериялар бере алады. Ал ішек микробиотасы иммундық жүйемен байланысты.
Дегенмен мұндай өнімдер тұмауды емдейтін құрал емес. Оларды көкөніс, жеміс, дәнді дақылдар және ақуыз көздерімен бірге әртүрлі мәзірдің құрамында тұтынған жөн.
Су мен жылы сусындар
Тұмау кезінде, әсіресе дене қызуы көтерілгенде, сұйықтықты жеткілікті ішу маңызды. NHS сусызданудан сақтану үшін су ішуді ұсынады. Зәрдің ашық сары болуы сұйықтықтың жеткілікті екеніне бағдар бола алады.
Судан бөлек, шай мен сүт те күнделікті ішілетін сұйықтық мөлшеріне кіреді. Ауырған немесе аурудан айығып келе жатқан кезде сұйықтыққа қажеттілік артуы мүмкін.
Сарымсақ тұмаудан қорғай ма?
Сарымсақты тағамға қосуға болады. Бірақ оны тұмауға қарсы дәлелденген ем деп атауға негіз жеткіліксіз. АҚШ-тың Ұлттық қосымша және интегративті денсаулық орталығы сарымсақтың иммундық жүйеге әсері жөніндегі зерттеулер аз әрі олардың сапасында шектеулер бар екенін көрсетеді. Сондықтан сарымсақты көп жеу аурудан сақтайды деген уәдеге сенбеген дұрыс.
Тамақтанумен ғана шектелмеңіз
Тұмау кезінде демалу, ұйқыны қандыру және сұйықтық ішу қажет. Жүкті әйелдер, егде жастағы адамдар және созылмалы ауруы бар науқастар тұмау белгілері байқалғанда дәрігерге ертерек хабарласқаны жөн. Қажет болған жағдайда дәрігер вирусқа қарсы ем тағайындайды: оның пайдасы аурудың алғашқы екі тәулігінде басталғанда жоғары болады.
