Әкім Сұлтанғазиев әкесі басқарған каналдағы делдалдарды тазартпақ

Ашық сұрақ қойылмаған сыпайы сұхбат пен жалпылама жауапқа толы әңгімедегі бір сөзінде Алматы облысының әкімі Марат Сұлтанғазиев облыстағы ауыл шаруашылығын өркендету жолында Үлкен Алматы каналын тілге тиек етіпті.

«Біз биыл бірінші рет Үлкен Алматы каналы мен шаруа қожалықтарының ортасындағы делдалдарды алып тастадық. Сөйтіп, су тарифін кәдімгідей арзандаттық. Яғни, су енді Үлкен Алматы каналынан шаруа қожалығына бірден жетеді» депті Марат Сұлтанғазиев.

Жалпы, әкім айтып отырған Үлкен Алматы каналы 1964-1986 жылдары Қазақстанның сол кездегі жетекшісі Дінмұхамед Қонаевтың тікелей бастамасы және бақылауымен салынған. Сол себепті бұл каналға Д.Қонаевтың аты берілген. Каналдың ұзындығы – 168 шақырым. Бұл каналға Алматы облысының Еңбекшіқазақ, Талғар, Іле, Қарасай аудандарындағы тұрғандардың күні қарап тұр. Судың басы қолдан жасалған Бартоғай бөгенінен алынады.

Бартоғай су қоймасы мен Д. Қонаев атындағы үлкен Алматы каналы мемлекет қарауында болғанымен 1990 жылдардың басынан бастап, канал мен шаруа қожалықтарының ортасында делдалдар пайда болған. Бұл мәселені жергілікті тұрғындар айтудан тіпті шаршаған.

Бір айта кетерлігі, Бартоғай су қоймасы мен Д. Қонаев атындағы үлкен Алматы каналын қазіргі Алматы облысының әкімі Марат Сұлтанғазиевтің әкесі Елеусіз Сұлтанғазиев ұзақ жылдар бойы басқарған болатын. Тіпті, Еңбекшіқазақ ауданының кейбір тұрғындары Үлкен Алматы каналын үлкен Сұлтанғазиев жекешелендіріп алды деп те қисынсыз әңгіме соғады.

Тағы да бір айта кететіні,  Алматы облысының әкімі Марат Сұлтанғазиевтің ағасы Қанат қай бір жылдары Еңбекшіқазақ ауданында әкім болған. Кіші Сұлтанғазиевтің бүгінгі сөзіне қарағанда ағасы ауданда әкім болып тұрған кезінде әкесі басқарған канал бойындағы делдалдарға ешқандай шара қолданбаған болып тұр.

Қалай десек те, су патшасы Сүлеймен демекші, үлкен Алматы каналы бойындағы судан шу шықса,  Сұлтанғазиевтердің аты да бірге шығатын.  

(Басты беттегі көрнекі сурет видеодан алынды)