«Арабтар сияқты болып алыңыздар». Қатардағы қазақ қыздары шетелдікке тұрмысқа шығу туралы ойын айтты

Бүгінде жұмыс бабымен Қатар елінде өмір сүріп жатқан қазақ қыздары аз емес. Олар шетелдік азаматтарға тұрмысқа шығу туралы ойын ашық айтты. Бұл туралы «Жалғыз жолаушы» youtube-арнасына сілтеме жасай отырып Malim.kz хабарлайды.

Қатарда тұратын Нұршат есімді қазақ қызы шетелдікке тұрмысқа шығуға қарсы емес.

Қазақстанда халықтың көбі айлықтан айлыққа дейін өмір сүреді. Олай болғанын қаламағандықтан келдім. Бізді «арабқұлдар» деп атайды. Бірақ «арабтар сияқты болып алыңыздар» деп айтқым келеді. Тазалықты, имандылықты, адамдардың арасындағы қарым-қатынасты арабтардан үйренуге болады. Жасым қазір 30-ға келді. Бұрын ата-анам «тек қана қазақ болсын» дейтін, қазір «мұсылман болса жеткілікті» дейді. Сондықтан шетелдік азаматқа тұрмысқа шығу мүмкіндігі болса, «жоқ» демейтін шығармын, деді Нұршат.

Ал Ақгүл есімді бойжеткен қатарлықтарға тұрмысқа шыққан қазақ қыздарының бар екенін алға тартты.

Қыздарға айтатыным, Қатарға келіңіздер. Күйеу іздеп жүрсеңіздер, бір әйелге төрт еркектен келеді. «Шейхқа тұрмысқа шығуға бола ма?» деп сұрайды. Әрине, бәрі мүмкін. Тағдыр ғой, кім біледі. Қатарға тұрмысқа шыққан қыздар көп, деді Ақгүл.

Бұдан бөлек, ол жақтағы жалақы, еңбектің бағалануы туралы әңгіме өрбітті.

Бұл жерде жалақы жақсы. Ұшақ билеттерін, тамақтануыңызды қамтамасыз етіп береді, жататын жеріңіз бар. Бұл жаққа жұмысқа келетін болсаңыз, өзіңізді сатуыңыз керек. Сондықтан бастапқыда жалақыны көп сұрау керек. Алайда қанша жылға келісімшартқа отырсаңыз, сонша жыл жұмыс істеуге міндеттісіз. Жалақылар 500 мың теңгеден басталады. Ал пилоттар тіпті 5 млн теңгеге дейін жалақы алады, деді Қатарда жүрген қазақ қызы.

Фото: youtube.com/@jalgyzjolaushy