Аштық жариялағандарды ақылға шақырды
Бүгін Жаңаөзен қаласы әкімдігі ғимарат сыртында бір топ азамат аштық жариялайтындарын мәлімдеп әлеуметтік желіге видео, фото таратты.
Олар мұнай-газ саласына жұмысқа орналасуды талап етіп отыр.
Жұмыс талап етушілердің алдына шыққан әкімдік өкілдері аштық жариялау мен талаптары заңсыз екенін ескертті.
Сондай-ақ, аштық жариялағандарды мұнай-газ саласына кезектен тыс жұмысқа алса, кезекте тұрған басқа адамдарға әділетсіз болатынын айтып, келіспейтіндерін жеткізді. Кейіннен әкімдік арнайы мәлімдеме таратты.
«Жаңаөзен қаласында арнайы алгоритм жұмыс істейді, оған сәйкес жұмыссыз тұрғындар жалпы кезекке сәйкес мұнай саласына жұмысқа орналасады», - дейді қала әкімдігінің мамандары.
Қазіргі уақытта Жаңаөзенде жұмысқа орналасуға, біліктілігін арттыруға мүмкіндік беретін бірқатар мүмкіндіктер бары айтылғанымен, талап қоюшылардың дені бірден мұнай-газ компаниясына орналастыруды сұрап отыр.
Ал мемлекеттік бағдарламалар арқылы жұмысқа орналасқан азаматтың мұнай саласына жұмысқа орналасуға тіркелген кезектілігі яғни алгоритм сақталады. Бұл басқа жұмыс істей отырып, сіз мұнай-газ секторында өз кезегіңізді күтуге мүмкіндік береді.
«Біз сіздердің кезексіз, қабылданған алгоритмнің шарттарын сақтамай мұнай-газ саласына тіке жұмысқа орналастыру жөніндегі талабыңызды орындай алмаймыз, өйткені бұл өз кезегін күтіп, әр түрлі салада тыныш жұмыс істейтін қала тұрғындарының құқықтарына нұқсан келтіреді. Біз сізді ақылға шақырамыз. Арандатушылыққа ұрынбаңыз», - дейді Жаңаөзен қаласы әкімдігінің жауапты шенділері.
Фото: lada.kz
