«Осымен тоқтайық». Серік Жұманғарин уақыт белдеуін қайтару туралы айтты

Үкіметте өткен баспасөз мәслихатында Премьер-министрдің орынбасары Серік Жұманғарин елдегі бұрынғы уақыт белдеуін қайтару туралы айтты.

- Негізінен алғанда, шешімді қабылдаудың белгілі бір регламенті бар. Үкімет қандай да бір шешімдер қабылдаған кезде әрдайым референдум өткізуі тиісті емес. Ол үшін алқалы орган бар. Бұл жағдайға келсек, шешім қабылдар алдында қажетті зерттеулер жүргізілді. Шешім белгіленген тәртіпке сәйкес қабылданды. Одан кейін регламент шеңберінде петиция пайда болды, петиция қаралып, түпкілікті шешім  қабылданды. Регламент бұзылған жоқ, - деді Серік Жұманғарин.

Айтуынша, қарсы тараптың «дәлелдері»  расталмаған.

- Қазір бірыңғай уақыт белдеуіне қарсы адамдар да бар. Олардың көбі айтқан дүниелер расталмай жатады. Мысалы, денсаулыққа кері әсері бары, электр энергиясын тұтыну көлемі артып жатқаны. Ерте тұру қажеттігі, кеш ерте бататыны да айтылады, – дейді ол.

Премьер-министрдің орынбасары бұл мәселені қысқа мерзімде емес, орта мерзімді перспективада зерттеп, оның қандай әсер ететінін анықтауды ұсынып отыр.

- Үкімет бұл мәселені көтеріп, қайталап түсініктеме беруді көздеп отырған жоқ. Егер біз әрдайым регламенттен ауытқып кете беретін болсақ... Шешім болды, петиция қаралды, шешімді бекіту керек деп ойлаймын. Осымен тоқтайық, — деді Серік Жұманғарин.

Фото: gov.kz