Нұрқаділовтің ұлы әкесінің өлімін қайта тергеуді талап етті
Саясаткер Заманбек Нұрқаділовтің ұлы Қайрат Нұрқаділов бас прокуратурадан әкесінің өлімін қайта тергеуді талап етіп, арыз жазған. Бұл туралы ол ҚазТАГ агенттегіне хабарлаған.
«Менің әкем – Заманбек Қалабайұлы Нұрқаділовті 2005 жылдың 12 қарашасында өз үйінде белгісіз адамдар атып өлтірген. Барлық фактілер қасақана қастандық екенін көрсетіп тұрса да, істі өзін-өзі өлтірді деп тергеген. Екі рет жүрегіне, бір рет басына атылған оқ істің бұлай қаралуына кедергі бола алмаған», - деді Нұрқаділов.
Оның айтуынша, баласы ретінде іспен таныса алмай, «істің мәтінін оқымай қол қоюға мәжбүр болған».
«Кінәлі адамдар табылмады, жазаланбады. Әкемнің не үшін қайтыс болғаны да белгісіз. Елдегі саяси жағдайға, белгілі бір мәселелерге байланысты және өзімнің, отбасымның өміріне қауіп төңгендіктен бұл талапты осыған дейін қоя алмадым. Мен әкемнің ұлы және осы елдің азаматы ретінде әділ әрі заң жүзіндегі тергеу болуы талап етемін», - деп қосты ол.
Ол Заманбек Нұрқаділовтің өлімі «саяси тапсырыс» екенін айтады.
«Бүгін біздің ел демократиялық жолға түсу мәселесін талқылауда. Ол жолға түсу үшін тарихымыздағы құпия әрі беймәлім өлімдер толық тергелуі керек», - деді ол.
Оған қоса, желіде Нұрқаділовтің өлімін тергеу туралы петиция тарады.
Заманбек Нұрқаділов әр жылдары Алматы қаласы мен облысының әкімі, Төтенше жағдайлар министрі қызметтерін атқарған. Қайтыс болардан бұрын ол сол кездегі президент Нұрсұлтан Назарбаев туралы сыни пікірлер айтқан.
